«Պետք է այնպես անեք, որ նիստին, բացի գործից, ուրիշ բանի մասին չմտածեմ». Հայկ Ալումյանը՝ դատավորին

ՀՀ նախկին նախագահ Ռոբերտ Քոչարյանի և մյուսների գործով փետրվարի 4-ի դատական նիստն սկսեց նրանով, որ դատավոր Աննա Դանիբեկյանը Ռ.Քոչարյանի պաշտպաններից պահանջեց ներկայացնել նախորդ նիստից բացակայության պատճառները:

Հայկ Ալումյանը նշեց, որ նիստին չներկայանալը իր՝ կարծիքի արտահայտման միակ ձևն էր: Հունվարի 9-ի նիստում տուժողի ներկայացուցիչ Էդիկ Հարությունյանի կողմից հնչել է սպառնալիքի խոսք, իսկ դատարանը նիստի բնականոն ընթացքն ապահովելու համար ոչ մի քայլ չի ձեռնարկել:

«Դուք պետք է այնպես անեք, որ ես երբ գալիս եմ այս նիստին, բացի գործից, ուրիշ բանի մասին չմտածեմ: Դա Ձեր պարտականությունն է: Մեր ֆրանսիացի կոլեգան արդեն քանի դատական նիստ է՝ չի կարողանում գալ, որովհետև ինքը սովոր չէ այսպիսի արարողությունների, որոնք մեր մեր երկրում չգիտես ինչու կոչում են դատական նիստ»,- ասաց Հ. Ալումյանը:

Արամ Օրբելյանը նշեց, որ նիստին ներկա չի գտնվել իր անվտանգության ապահովման անհրաժեշտությունից ելնելով: Դատական նիստի ժամանակ իր հասցեին հնչել է սպառնալիք, սպառնալիք՝ նաև անեծքի տեսքով:

«Ակնկալվում է, որ դատարանը պետք է ապահովի բոլոր մասնակիցների անվտանգությունը: Պաշտպանների անկաշկանդ աշխատելու իրավունքը երաշխավորված է Եվրոպական կոնվենցիայով, ինչի խախտման համար այս դահլիճում ներկա գտնվող անձանցից մեկը՝ տիկին Սաֆարյանը մեկ այլ գործով Եվրոպական դատարանում ունի հաղթանակ»,- հայտարարեց պաշտպանը:

Դատական նիստին չներկայանալու նույն հիմնավորումները ներկայացրեց պաշտպան Ռուբեն Սահակյանը:

Հովհաննես Խուդոյանը որպես բացակայության պատճառ վկայակոչեց այն, որ ինքը տեղեկացված չի եղել, որ տվյալ օրը դատական նիստ է տեղի ունենալու: Ա. Օրբելյանը հավելեց՝ ենթադրելով, որ դատարանն իրենց հանդեպ սանկցիա է կիրառելու, ասաց. «Եթե իրենց գործողությունը հիմք պետք է լինի սանկցիայի կիրառման համար, ապա իրենք էլ իրենց գործողությունները կձեռնարկեն՝ չսահմանափակվելով հարցը ԲԴԽ-ին հայտնելով»:

Դատավորի ճշտող հարցին, թե այսօրվա նիստին ներկայանալով սպառնալիքի վտանգը վերացվա՞ծ է, Հ. Ալումյանը նկատեց, որ իրենց դժգոհության հասցեատերը ոչ թե Է. Հարությունյանն է, այլ հենց իրեն՝ դատավորին: «Մենք բողոքում ենք Ձեր անգործության, ոչ պրոֆեսիոնալ մոտեցումների նկատմամբ»,- հայտարարեց փաստաբանը:

Դատավոր Ա. Դանիբեկյանը, լսելով կողմերին, նշեց, որ դատարանը պաշտպանների արարքը միտված էր դատական նիստի բնականոն ընթացքը խոչընդոտելուն: Ըստ նրա՝ դատարանից դժգոհությունները նիստին չներկայանալու հիմք չեն: Ուստի՝ դատարանը պաշտպանական կողմի ներկայացուցիչների հանդեպ նկատողության տեսքով սանկցիա կիրառեց: Այնուհետև դատարանն անցավ միջնորդությունների քննարկմանը: