«Գնալով ավելի քիչ ինֆորմացիա ենք ունենալու՝ ինչ փաստաթուղթ է դրված սեղանին». Էլիբեգովա

«Արդեն մեկուկես տարի է, որ ադրբեջանցիները փորձում են լեգիտիմացնել ադրբեջանական համայնքը. Ադրբեջանը Արցախում վիրտուալ ստեղծել է ընտրատեղամասեր, և առաջիկա խորհրդարանական ընտրություններին իրենք թեկնածու ունեն Ստեփանակերտի «ընտրատեղամասից», որն էլ ընտրվելու դեպքում լինելու է բարձր սուբյեկտայնություն ունեցող անձնավորություն»,- «Արմնյուզ» հեռուստաընկերության եթերում ասել է Ադրբեջանի հարցերով փորձագետ Անժելա Էլիբեգովան:
ՀՀ մարդու իրավունքների առաջին պաշտպան Լարիսա Ալավերդյանը եթերի ընթացքում կարևորել է հանրության հետ աշխատանքը և նշել, որ նախորդ երեք նախագահները մշտապես շատ հստակ են իրենց դիրքորոշումն արտահայտել Արցախի հարցի լուծման վերաբերյալ. «Ես քննադատում եմ երեք նախագահներին, որովհետև մենք այդպես էլ չկարողացանք բանակցային սեղանին դրված «Մադրիդյան սկզբունքների» մեջ փոփոխություններ մտցնել, ինչի պատճառով էլ հայտնվել ենք իրավունքների ոտնահարման գոտում»:

Հարցին՝ ի՞նչ մոտեցումներ ունի այսօրվա իշխանությունը, Ալավերդյանը պատասխանել է. «Ես վախենում եմ, որ այս իշխանությունն ունի իր իսկ մոտեցումներն արցախյան հարցի շուրջ»:

Նա նշել է, որ չի հասկանում՝ որքան պետք է խոսեն նախկինների թողած ժառանգությունից, որովհետև նախկիններն իրենց արածների համար, ինչպես ինքն է նշում, տեսնում ենք՝ որտեղ են:

Անդրադառնալով ՀՀ և Ադրբեջանի ԱԳ նախարարներ Զոհրաբ Մնացականյանի ու Մամեդյարովի հանդիպմանը՝ Անժելա Էլիբեգովան ասել է. «Բանակցությունները փաստացի մտնում են ինտենսիվ փուլ: Կա հստակություն՝ ինչ-որ փաստաթղթի շուրջ բանակցել, սակայն մենք գնալով առավել քիչ ինֆորմացիա ենք ունենալու՝ ինչ փաստաթուղթ է դրված սեղանին»:

Մանրամասները՝ տեսանյութում: