«Եկել է հացադուլից դուրս գալու ճիշտ պահը». Մհեր Պողոսյան

Ստեփանակերտի բնակիչ Մհեր Պողոսյանը, ով ևս հացադուլ էր հայտարարել՝ սատարելով Ալեքսանդր Քանանյանին, ֆեյսբուքյան իր էջում գրել է. «Սիրելի հայրենակիցներ, ես հացադուլ եմ հայտարարել՝ ի պաշտպանություն Ալեքսանդր Քանանյանի պահանջների, որոնք համարել եմ արդար և իրավացի։ Երեկոյան տեղեկացել եմ, որ Ստեփանակերտում ձևավորվել է մասնագիտական հանձնաժողով, որը պետք է ուսումնասիրի ՓՀԷԿ-երի համապատասխանությունն օրենսդրությանը, իսկ Ալեքսանդր Քանանյանը հացադուլից դուրս գալու մասին հայտարարություն է տարածել՝ ինձ ևս հորդորելով նույն որոշում կայացնել։

Ես համոզված եմ, որ միայն հանձնաժողովն ու իր քննության սահմանափակ շրջանակները թույլ չեն տալու ստանալ ՓՀԷԿ-երի վնասների մասին ամբողջական պատկերը։ Պնդում և պահանջում եմ, որ այդ նույն հանձնաժողովը գործուղվի նաև Արցախի այլ շրջաններ, մասնավորապես՝ Քաշաթաղ, որտեղ վիճակն ավելի աղետալի է։ Համարում եմ, որ հարկավոր է ստուգել նաև բոլոր ՓՀԷԿ-երի ֆինանսավարկային փաստաթղթերը, որպեսզի բացահայտվեն դրանց հիմքում ընկած կոռուպցիոն երևույթները։ Նույնպես կարծում եմ, որ սա մեր դեռ առաջին մեծ ձեռքբերումն է՝ խնդրի լուծման ճանապարհին։ Ես՝ որպես քաղաքացի, անպայման հետևելու և պայքարելու եմ, որ մեր բոլորի պահանջները դառնան վերջնական և անշրջելի իրողություն։

Մյուս կողմից՝ պայքարի այս փուլն ավարտված եմ համարում։ Լինելու են պայքարի նոր՝ միգուցե ավելի թեժ պահեր և ես՝ իմ բոլոր գաղափարակից ընկերների հետ միասին դրան պատրաստ եմ։ Մենք ոչինչ չենք զիջելու։ Մեր հայրերի արյամբ ազատագրված Հայենիքը պիտի ծաղկի և ունենա արդար իշխանություն և բարգավաճող տնտեսություն։ Այդ նպատակն իրականություն դարձնելու համար մեզ բոլորիս ուժ և վճռականություն է պետք։

Իսկ այսօր եկել է հացադուլից դուրս գալու ճիշտ պահը։ Ես խոնարհվում և շնորհակալություն եմ հայտնում ինձ բարոյական, մարդկային և գաղափարական աջակցություն ցուցաբերած բոլոր հայրենակիցներիս։ Ես ուժեղ եմ միայն ձեզնով՝ ձեր կողքին՝ հանուն մեր ընդհանուր և սուրբ նպատակի։ Շնորհակալություն բոլորիդ։ Պայքարը հանուն մեր ազային ապագայի շարունակվում է և մենք այն հաջողությամբ կպսակենք»։