Դատախազը՝ Ռ. Քոչարյանի պաշտպանների՝ նիստից բացակայության մասին

Վերաքննիչ դատարանի փետրվարի 6-ի նիստին վճռի հրապարակմանը չէին ներկայացել Ռ. Քոչարյանի պաշտպանները: Նախորդ նիստում նրանցից մեկը՝ Հովհաննես Խուդոյաննն ասել էր, որ 100 տոկոսով վստահ է, որ դատարանը բավարարելու է դատախազի բողոքը: Լրագրողների հետ ճեպազրույցում դատախազ Պ. Պետրոսյանը, անդրադառնալով այդ հայտարարությանը, ասաց. «Դրանք իրենց կողմից մեկնաբանություններն են, իմ կողմից մեկնաբանվել չեն կարող»:

Դատախազը նշեց, որ դատարանի պատճառաբանություններին դեռ չեն ծանոթացել: Ըստ էության՝ առաջին ատյանի կայացրած վճիռն արդեն գոյություն չունի: Հարցին, թե դրանից կարելի՞ է ենթադրել, որ Մարտի 1-ի գործի նյութերն այլևս հրապարակման ենթակա չեն, և տվյալ հարցում օրենսդրական բաց կա՞, որովհետև առաջին ատյանը մի վճիռ է կայացնում, Վերաքննիչը՝ այն բեկանում, Պ. Պետրոսյանն ասաց, որ բաց չկա, կա օրենքի միատեսակ կիրառության հարց: Ըստ նրա՝ օրենսդրությամբ կա նաև Վճռաբեկ դատարան բողոքարկելու ընթացակարգ:

«Եթե Վճռաբեկ դատարանը որոշի օրենքի միատեսակ կիրառություն ապահովել, ապա կայացրած վճռից հետո կհստակեցվի հարցը»,- ասաց նա:

Հարցին, թե մեղադրող կողմը մտավախություննե՞ր ունի Մարտի 1-ի գործի նյութերն ամբողջությամբ տրամադրելու հարցում, մեղադրող կողմի ներկայացուցիչը նշեց, որ իրենք մտավախություններով չեն առաջնորդվում, գործում են դատավարական օրենսդրությամբ ամրագրված ընթացակարգերով: