«Թուրքիան չի կարող դե ֆակտո պարտության հետ համակերպվել». Կ. Հովհաննիսյան

Քրդագետ, թուրքագետ Կարեն Հովհաննիսյանը ֆեյսբուքյան իր էջում գրել է. «Սիրիայում հարաբերական անդորր է, սակայն սա երկար չի տևելու, քանի որ Թուրքիան չի կարող դե ֆակտո պարտության հետ համակերպվել: Պարզապես այս շրջանում մի փոքր դադար էր պետք Թուրքիային, որպեսզի նախ և առաջ լուծի ներքին քաղաքական հարցերը քաղաքական դաշտում և ներքին ազգային հարցերը քրդերի հետ: Երբ Թուրքիան Իդլիբում զբաղված էր ռազմական գործողություններով, այդ ընթացքում Հայաստանի Հանրապետությունից ոչ շատ հեռու Աղըր նահանգի Բայազետ քաղաքում տեղի ունեցավ վերջին շրջանում, կարելի է ասել, բացառիկ հարձակում թուրքական բանակի անձնակազմի վրա. տուժեցին թուրքական բանակի ավելի քան 80 զինվոր, 3 հոգի զոհվեց (մեկը տեղում, երկուսը՝ հետագայում, հիվանդանոցում), վիրավորների թիվն անցավ 50-ը: Հարձակում էին գործել զինվորներին տեղափոխող ավտոբուսների վրա:
Այս ֆոնին Թուրքիան հասկացավ, որ չի կարող միաժամանակ ռազմական գործողություններ իրականացնել Սիրիայում, Լիբիայում զորք ուղարկել, ներքին քաղաքական և ազգային հարցերը լուծել, դրա համար Սիրիայում վերցրեց թայմ աութ, իսկ մինչ այդ իր քրդաբնակ նահանգներում հայտարարեց պարետային ժամ:
Կարծում եմ, որ ապրիլին կրկին թեժացումներ կլինեն, սակայն այս անգամ այն չի զարգանա հանկարծակի սցենարով, քանի որ Թուրքիան փորձելու է համագործակցություն ստիպել, իսկ եթե չհաջողվի ստիպել, ապա եզրեր փնտրել Արևմուտքի և Եվրոպայի հետ, որպեսզի Ռուսաստանից հեռացումից հետո միայնակ չմնա»: