«Մոտակա ամիսներին գնաճը մնալու է ցածր մակարդակի վրա». ԿԲ խորհրդի անդամ Արթուր Ստեփանյան

«Մոտակա ամիսներին գնաճը մնալու է ցածր մակարդակի վրա: Երբ նայում ենք, թե կառավարութունն ինչ ջանասիրությամբ է առաջին անհրաժեշտության ապրանքների մատակարումներին ու գներին վերաբերվում, կարող ենք արձանագրել, որ գնաճի ոչ մի ռիսկ չենք տեսնում». նման համոզմունք հայտնեց ՀՀ Կենտրոնական բանկի խորհրդի անդամ Արթուր Ստեփանյանը՝ անդրադառնալով կորոնավիրուսից հետո գնային հնարարավոր տեղաշարժերին:
Ա. Ստեփանյանը տեղեկացրեց, որ բանկերը և վարկային կազմակերպությունները պատրաստ են վերաձևակերպել պարտավորություններն այնպես, որ հաճախորդների վարկային բեռը չավելանա: Թե քանի հաճախորդի են առևտրային բանկերը վարկային մարման հետաձգում տրամադրել, ԿԲ պաշտոնյան թիվ չնշեց:
Հարցին, թե ռուսական ռուբլու արժեզրկումը որքան կտևի, և ի՞նչ բացասական հետևանքների կբերի, Ա. Ստեփանյանը նկատեց. «Ռուսական ռուբլին մեքսիկական պեսոյի հետ համարվում է 2-րդ տատանողական արժույթն աշխարհում, ինչը ոչ միայն այս վիճակի, այլև նավթի գների տատանման հետևանք է: Այս առումով անորոշության մասը մեծ է: Այս պահին ոչ ոք չի կարող ասել, թե ինչ զարգացումներ կլինեն ռուսական արժույթի հետ: ՀՀ ԿԲ քաղաքականությունն այնպիսին է լինելու, որ հավասարակշռենք գնային ու ֆինանսական կայունությունը, և դրանք հավասարակշռենք մեր տնտեսական ակտիվության պահպանման հետ»:
Ամեն դեպքում՝ ԿԲ-ն հավատարիմ է լողացող կուրսի քաղաքականությանը, և ՀՀ-ն կհաղթահարի ներկայիս դժվարությունը, ինչպես 2014թ. հաղթահարեց տնտեսական դժվարությունը, հավաստիացրեց պաշտոնյան։

Նրան հիշեցրին, որ 2014թ. հետո հայկական դրամը 20 տոկոսով արժեզրկվեց և նույն մակարդակին էլ մնաց:
ՀՀ Կենտրոնական բանկի խորհրդի անդամը դարձյալ պնդեց, որ չնայած վերոնշյալ հանգամանքին, ՀՀ վերջին 5-10 տարիների վիճակագրությունը ցույց է տալիս, որ ամենացածր գնաճային միջավայրում գտնվող երկրներից մեկն ենք:
«Գնաճը մարդկանց գնողունակության վրա չի ազդել: Մի ուղերձ հստակ է՝ գնաճը ՀՀ-ում մնալու է ամենացածր մակարդակում»,- հայտարարեց նա:
Վարչապետը վերջերս հայտարարել էր, որ տնտեսությանը 150 մլրդ դրամի աջակցություն է տրվելու: Ա. Ստեփանյանը նկատեց, դրա համար ՀՀ կառավարությունը ԿԲ-ից պարտք չի վերցնելու, ինչպես ենթադրել էին ոմանք: Աջակցությունը տրվելու է խնայված միջոցներից:
Իսկ թե ինչպե՞ս կփոխվեն ՀՀ արտաքին և ներքին պարտքի ծավալները ներկայիս պայմաններում, Ա. Ստեփանյանը դժվարացավ կանխատեսել:
«Դեռ պետք է սպասել: Ամեն ինչ կախված է վիճակի ուժգնությունից ու տևողությունից»,- ասաց նա:
ԿԲ ներկայացուցիչը քաղաքացիներին կրկին հորդորեց ոչ միայն փոխել հին թղթադրամները, այլև վճարումներ կատարել առցանց՝ վիրուսից պաշտպանվելու համար: