Կիրակի, 29 մարտի, 2020 թ.
|
Ստեփանակերտում`   +6 °C

«Մենք հավերժորեն վատ վիճակում ենք, որովհետև ատում ենք լսել դառը ճշմարտությունը». Հայկ Մարտիրոսյան

«Մենք հավերժորեն վատ վիճակում ենք, որովհետև ատում ենք լսել դառը ճշմարտությունը». Հայկ Մարտիրոսյան
104
Երկուշաբթի, 23 մարտի, 2020 թ., 00:10

Քաղաքագետ Հայկ Մարտիրոսյանն ԱՄՆ-ից տեսակապի միջոցով վերլուծություն է կատարել կորոնավիրուսի և դրա դեմ պայքարում ՀՀ կառավարության կատարած քայլերի վերաբերյալ:
Ըստ քաղաքագետի՝ իշխանություններն ամեն առիթով փորձում են նսեմացնել վարակի վտանգավորությունը և արտակարգ դրության պայմաններում իրագործում են կիսատ-պռատ, լիբերալ քայլեր: Հայաստանյան բժիշկները, ներառյալ վարակաբանները, չունեն այլ աղբյուր և գիտելիք կորոնավիրուսի մասին, քան այն տեղեկատվությունը, որը տեսականորեն հայտնի է բոլորիս: Հայ մասնագետները նախընտրում են ցածրակարգ, մերձավոր արտասահմանի աղբյուրներ:
Հ. Մարտիրոսյանն այն կարծիքը հայտնեց, որ ՀՀ-ն կորցրեց այն գերարժեքավոր ժամանակահատվածը, որն ուներ մինչ համաճարակը՝ օգտագործելու գալիք իրավիճակը վերահսկելու համար: ՀՀ կառավարությունը Ս. Սարգսյանի ժամանակների ժառանգորդն է այն իմաստով, որ երբևէ նախաձեռնող ու կանխարգելող չի եղել, մշտապես գործել է արձագանքման ռեժիմում: Կառավարությունը ցուցաբերեց բացառիկ անգործություն, որն արտացոլվեց կառավարության արտակարգ նիստի ժամանակ:
Դեռ համաճարակի շեմին ՀՀ վարչապետը հայտարարեց, թե «տնտեսական դինամիկան չկորցնելու համար միջոցներ պետք է ձեռնարկել»:
«Իլյուզիաների տա՞կ է վարչապետը, ողջ աշխարհի տնտեսագետները պնդում են, որ ամենայն հավանականությամբ, համաշխարհային հզոր ռեցեսիա է սկսվում, որ կարող է վերածվել համաշխարհային դեպրեսիայի, իսկ ՀՀ-ում կարծում են, որ ոչ միայն հնարավոր է դիմակայել ռեցեսիային, այլև ըստ վարչապետի՝ պահպանել տնտեսական դինամիկան: Սա ցույց է տալիս, որ չկա համարժեք մոտեցում: Ոչ ադեկվատ պատկերացումների արտահայտություն էր նաև «թու, թու, թու կորոնավիրուս ՀՀ-ում դեռ չկա»-ն:
Եթե համեմատում ես Ֆրանսիայի նախագահ Էմանուել Մակրոնի, Գերմանիայի կանցլեր Անգելա Մերկելի և այլ ղեկավարների ելույթները, դրանք բոլորը տագնապի ահազանգ էին, աշխարհում այլ մոտեցում էր, ՀՀ-ում՝ բոլորովին այլ: Եվ այդ ամենն ընթանում էր «այո»-ի քարոզարշավի ֆոնին, երբ վարչապետը համբուրվում էր, գրկախառնվում, ձեռքսեղմումների դրվագներ ունենում, նաև ուտում հայրենակիցների հետ: Եվ միայն Վայքի դրվագից հետո վարչապետը թեսթ անցավ, ի դեպ՝ դառնալով աշխարհում միակ ղեկավարը, որը 2 անգամ թեսթ անցավ:
«Մենք հավերժորեն վատ վիճակում ենք և չենք կարողանում ուղղել մոր ողնաշարը, որովհետև երբեք չենք ցանկանում տեսնել վատը, ատում ենք լսել դառը ճշմարտությունը»,-նկատեց Հ. Մարտիրոսյանը:
Քաղաքագետի գնահատմամբ՝ Հայաստանում խուճապի հանդեպ խորրդային պատկերացումները չեն փոխվել:
«Այսօր էլ ՀՀ իշխանավորների առաջին պատականությունը ամեն գնով խուճապ ցույց չտալն է: Եվ ՀՀ-ն դառնում է միակ երկիրը, որտեղ խուճապ թույլ չտալու համար արտակարգ դրության մասին փաստաթղթում ներառվում է մի գլուխ, որտեղ, ըստ էության, սահմանափակվում է ազատ խոսքի և տեղեկատվության իրավունքը»,- նշել է քաղաքագետը:
«Միայն Հայաստանում է, որ արտասահմանյան բացասական հեռանկարներ պատկերող զգուշացումներն օտար լեզուներով նորմալ են ընդունվում և անգամ հեղինակություն վայելում, բայց բառացիորեն նույն բառերը հայերենով համարվում են նեգատիվիզմի բացառիկ նմուշներ: Խնդիրը հայերի մենթալիտետի մեջ է:
«Մենք անկարող ենք դառը ճշմարտություններ ընկալել: Մենք սարսափում ենք դրանցից և քարկոծում զգուշացնողներին, հնարավոր վտանգից դեղատոմս առաջարկողներին»:
Քաղաքագետը հարկ է համարել նկատել, որ իր ընդդիմությունն ու քննադատությունը մշտապես եղել են մասնագիտական շրջանակներում:

«Մենք հավերժորեն վատ վիճակում ենք, որովհետև ատում ենք լսել դառը ճշմարտությունը». Հայկ Մարտիրոսյան