«Ո՞ր պաշտոնյան է զգուշացնում նախկին հանցագործներին հարուցվող քրգործերի մասին»․ Արտակ Գալստյան

Իրավապաշտպան Արտակ Գալստյանը ֆեյսբուքյան իր էջում գրել է. «Օրերս կրկին անգամ հաղորդագրություն տարածվեց նախկին երկու իշխանավորների կողմից առերևույթ կատարված հանցագործությունների դեպքով հարուցված քրեական գործերի և նրանց նկատմամբ հայտարարված հետախուզման մասին:
Կրկին անգամ քրեական գործերը հարուցվեցին, երբ առերևույթ հանցանք կատարած անձինք լքել էին երկիրը:
Կրկին անգամ հարուցված քրեական գործերը կոռուպցիոն բնույթի էին և առնչվում էին ժողովրդից թալանված գումարներին, որոնք որ ըստ հեղափոխության տեսլականի, կոպեկ առ կոպեկ պետք է վերադարձվեին պետբյուջե:
Այդ գումարների հետ վերադարձը, հաշվի առնելով կորոնավիրուսի համաճարակի հետևանքով վատթարացած տնտեսական վիճակը, այսօր առավել քան անհրաժեշտ են պետությանը և ժողովրդին:
Մի հին խոսք կա,
«Եթե քեզ խաբում են առաջին անգամ ապա դիմացինդ ուղղակի խարդախ է և արժանի չէ քո վստահությանը:
Եթե նույն մարդուն հաջողվում է քեզ խաբել երկրորդ անգամ, ապա մեղավորը դու ես:
Եթե նույն մարդուն, հաջողվում է քեզ խաբել երրորդ անգամ, ապա դու անբուժելի հիմար ես:
Եթե նույն մարդուն հաջողվում է նույն փաստական հանգամանքներով, քեզ խաբել մի քանի տասնյակ անգամ, ապա դա նշանակում է, որ քեզ չեն խաբում, դու ուղղակի հանցակից ես նրա հետ, իսկ այն որ դու իբր խաբված ես և դժգոհ քեզ խաբողների աշխատելավոճից, ընդամենը քարոզչական հնարք է հետագա պատասխանատվությունից խուսափելու համար»:
Հայաստանում հիմար ղեկավարներ չկան, դա հանրահայտ փաստ է, ընդհանրապես հիմարները իշխանության չեն հասնում:
Այստեղից էլ տրամաբանական հարց է առաջանում, ո՞ր պաշտոնյան է զգուշացնում նախկին հանցագործներին հարուցվող քրեական գործերի մասին, ապահովում նրանց փախուստը Հայաստանից, ո՞րքան գումարի դիմաց և ինչո՞ւ այդ պաշտոնյաները մինչ օրս ոչ միայն հայտնաբերված ու պատժված չեն, այլ շարունակում են պաշտոնավարել, ստանում են գեներալական կոչումներ և ծիծաղում են ժողովրդի վրա:
Երբ այս հարցի պատասխանը կունենանք, ապա այլևս կորոնովիրուսի դեմ պայքարի համար ֆինանսական օգնության կարիք չենք ունենա»: