Սահմանադրական դատարանը կքննի Արման Թաթոյանի դիմումը

Ապրիլի 28-ին Սահմանադրական դատարանը գրավոր ընթացակարգով կսկսի քննել Մարդու իրավունքների պաշտպան Արման Թաթոյանի դիմումը: ՄԻ պաշտպանը վիճարկում է «ՀՀ դատական օրենսգիրք» ՀՀ Սահմանադրական օրենք-ի 9-րդ հոդվածը։ Այն վերաբերում է դատական գործի քննության ժամկետին: Ըստ այդ հոդվածի՝ գործի քննությունը և լուծումը պետք է իրականացվեն ողջամիտ ժամկետում՝ հաշվի առնելով գործի հանգամանքները, ներառյալ՝ իրավական և փաստական բարդությունը, վարույթի մասնակիցների վարքագիծը և վարույթի մասնակցի համար գործի տևական քննության հետևանքները, հնարավոր սեղմ ժամկետում գործի քննությունն ու լուծումն իրականացնելու նպատակով դատարանի կատարած գործողությունները և դրանց արդյունավետությունը, գործի քննության ընդհանուր տևողությունը, Բարձրագույն դատական խորհրդի սահմանած՝ գործի քննության միջին ուղենիշային տևողությունը:
Ըստ Ա. Թաթոյանի՝ դատարաններում գործերը ողջամիտ ժամկետում քննելու սահմանադրական պահանջի պատշաճ ապահովման ճկուն մեխանիզմ նախատեսված չէ: Ամրագրված չէ ողջամիտ ժամկետում գործի դատական քննության խախտված իրավունքի վերականգնման օրենսդրական հնարավորությունը: Եվ այնպես է ստացվում է, որ օրենսդրական գործող կարգավորումների պայմաններում դատարանում գործի քննությունը կարող է տարիներով ձգձգվել և անհետևանք մնալ դատարանի համար:
ՍԴ-ում գործով զեկուցող է նշանակվել Սահմանադրական դատարանի դատավոր Ա. Դիլանյանը: Որպես պատասխանող է ներգրավվել Ազգային ժողովը: