«100-ից ավելի զոհ չի եղել, ապրիլի 2-5-ը եղել է 75 զոհ». Լևոն Մնացականյան

Ապրիլյան քննիչ հանձնաժողովն ավարտեց այսօրվա նիստը, որտեղ հանձնաժողովի հարցերին պատասխանեց պատերազմի ժամանակ պաշտպանության բանակը ղեկավարած Լևոն Մնացականյանը:

Նիստի ավարտին հանձնաժողովի նախագահ Անդրանիկ Քոչարյանն ասաց. «Հանձնաժողովի աշխատանքը գնահատում եմ արդյունավետ: Մնացածը կյանքը ցույց կտա՝ մեր եզրակացությունների մեջ ինչքանով այդ արդյունավետությունն արտացոլված կլինի»։

Ըստ նրա՝ իրենց հարցերին տրվել են սպառիչ պատասխաններ: «Նույնիսկ հարցաշարի մեջ չմտած հարցերի մասին ենք խոսել: Հանձնաժողովի աշխատանքը միտված է լինելու մեր անվտանգության համակարգի ուժեղացմանը»,- նշեց Ա. Քոչարյանը:

Լևոն Մնացականյանն էլ հավելեց. «Ես տվել եմ բոլոր հարցերի պատասխանները, որոնք հուզել են հանձնաժողովին: Ներկայացրել ենք այն իրականությունը, որը եղել Ապրիլյան պատերազմի ժամանակ: Միանշանակ ՊԲ-ն կատարել է իր առջև դրված խնդիրները, հաղթանակել է»:

Լ. Մնացականյանը ձեռնպահ մնաց պատասխանել այն հարցին, թե այդ օրերին օպերատիվ հետախուզական տվյալների պակաս եղե՞լ է, թե՞ ոչ: Ըստ նրա՝ այդ հարցով դեռ հանձնաժողովը կորոշի. եթե կարիք լինի ներկայացնել, կներկայացվի:

Մնացականյանը հերքեց, թե պատերազմին 100-ից ավելի զոհ է եղել․ «Ապրիլի 2-5-ը եղել է 75 զոհ, որից 35-ը՝ ժամկետային զինծառայողներ»:

Ի վերջո՝ որքա՞ն է եղել տարածքային կորուստը՝ 800 հա, թե՞ 400, նշեց՝ «մեր հաշվարկով 400»: