Ինչո՞ւ ոստիկանները չկրակեցին՝ հիվանդանոց ներխուժածներին սթափեցնելու համար․ «Ժողովուրդ»

«Ժողովուրդ» օրաթերթը գրում է․ «Երեկ զարհուրելի սպանություններ հաջորդեցին մեկը մյուսին Գեղարքունիքի մարզում: Գավառի և Նորատուսի երիտասարդ բնակիչները արդեն անհիշելի պատճատներով վիճաբանել էին, որին խառնվեցին մեծերը՝ հայրիկները: Արդյունքում կրակոցներից մահացան երկու հոգի, վիրավորվեցին մի քանիսը, իսկ ավելի ուշ ոստիկանների և ոստիկանապետ Արման Սարգսյանի աչալուրջ հսկողության պայմաններում մեկ տասնյակից ավել մարդիկ՝ նախնական տեղեկություններով նորատուսցիներ, ներխուժեցին Գավառի հիվանդանոց և կտրեցին հիվանդասենյակում գտնվող երկու վիրավորների վզերը:
ՀՀ ոստիկանությունը պաշտոնական հաղորդագրություն այդպես էլ չտարածեց՝ իմանայինք ով ինչի համար կրակեց, իրականում քանի զոհ ու վիրավորներ կային: Միայն դեպքից 8 ժամ անց մի հաղորդագրություն տարածելու փորձ արվեց՝ այն էլ ոչ թե ինֆորմացիա հաղորդելու նպատակով, այլ փորձ էր արվում փրկել ոստիկանապետ Արման Սարգսյանի դեմքը՝ հայտնելով, թե նա եղել է դեպքի վայրում՝ այլ ոչ թե հվանդանոցում: Հիշեցնենք՝ դեպքի վայրը փողոցն է եղել՝ Գավառի Ազատության փողոցը:

Իհարկե, «Ժողովուրդ» օրաթերթի աղբյուրները հակառակն են պնդում. նա հիվանդանոցում է եղել ոստիկանների հետ, բայց նույնիսկ եթե ընդունենք, որ ՀՀ ոստիկանապետը հիվանդանոցում չի եղել: Նրան շտապ զեկուցել են չէ՞՝ հիվանդանոց ներխուժելու և մարդկանց «մորթելու» մասին, այդ ժամանակ ինչո՞ւ չի շտապել «նոր դեպքի վայր»՝ իրավիճակը վերահսկողության տակ վերցնելու: Ումից է կաշկանդվել կամ վախեցել. հարց է, որ շարունակ հնչում է օդում: Ու բացի այդ, եթե ոստիկանական ուժերը հիվանդանոցի տարածքը հսկելիս են եղել, ինչու չեն կրակել՝ թեկուզ օդ, ներխուժող նորատուսցիների մուտքը խափանելու համար»:

Մանրամասները՝ թերթի համարում։