Խորհրդարանն ընդունեց բյուջեի փոփոխությունների նախագիծը

ԱԺ-ն ապրիլի 29-ի նիստում 101 կողմ, 17 դեմ ձայների հարաբերակցությամբ ընդունեց ՀՀ 2020թ. պետական բյուջեում փոփոխություններ կատարելու նախագիծը:

Դրանով կառավարությունը նախատեսել է 150 մլրդ դրամ սոցիալ տնտեսական աջակցության փաթեթ հետևյալ հիմնական ուղղություններով: 25-ական մլրդ դրամ՝ ձեռնարկություններին և սոցիալական աջակցությանը, 80 մլրդ դրամ՝ տնտեսական երկարաժամկետ զարգացմանն ուղղված ծրագրերին, 20 մլրդ դրամ էլ՝ պահուստային միջոցներ անհրաժեշտ վերաբաշխումներ իրականացնելու համար:

Ընդունվեցին նաև «Արտակարգ դրության իրավական ռեժիմի մասին» օրենքում, «Նորմատիվ իրավական ակտերի մասին» օրենքում, ՀՀ աշխատանքային օրենսգրքում լրացումներ և փոփոխություններ կատարելու մասին նախագծերը:

Դրանով ԱԺ-ն սպառեց արտահերթ նիստի օրակարգը: