«Հիմա քաղաքացիները պետք է ակտիվ պահանջատիրական վարքագիծ դրսևորեն». Գևորգ Գալստյան

Քաղաքագետ Գևորգ Գալստյանը ֆեյսբուքյան իր էջում գրել է. «Իշխանություններն ամեն հարմար առիթով նշում են, որ իրենք ընտրվել են լեգիտիմ ընտրական գործընթացի արդյունքում: Այո, ընտրական գործընթացը լեգիտիմ էր, սակայն լեգիտիմ չէ նրանց կողմից ներկայումս իրացվող քաղաքական վարքագիծը: Նման բարդ աշխարհաքաղաքական իրադրությունում՝ իրենց իշխանությամբ արտոնած քաղաքացիներին, էլեկտրոէներգիայով ապահովելը նվազագույնն էր, ինչն իշխանությունները, ի դեմս հեղափոխության երբեմնի առաջնորդի, կարող էին անել: Հիմա քաղաքացիները պետք է ակտիվ պահանջատիրական վարքագիծ դրսևորեն, քանի որ լռությունը նպաստելու է իրենց սոցիալական կացության վատթարացմանը և իշխանությունների անտարբերության խորացմանը:
Հայ հասարակությունը չպետք է թույլ տա, որ մերժված ռեժիմի հանդեպ նախկինից գոյություն ունեցող կայուն բացասական վերաբերմունքը ներկայիս իշխանություններն օգտագործեն իրենց քաղաքականության հանդեպ ձևավորված բողոքը զսպելու համար: Հայ հասարակությունը պետք է հստակ գիտակցի, որ մերժված ռեժիմի դեմքերը չեն կարող վերադառնալ իշխանության, եթե ինքը չցանկանա: Սակայն պետք է բացառի ոչ միայն մերժված անձերի վերադարձը, այլև մերժված ռեժիմի վերահաստատումը»: