«Անդաստիարակ այս պահվածքի առաջամարտիկները թող ականջներին օղ անեն». Արսեն Խառատյան

«Ալիք մեդիա»-ի գլխավոր խմբագիր Արսեն Խառատյանը ֆեյսբուքյան իր էջում գրել է. «Վերջին օրվա ընթացքում ես ու ընտանիքս համերաշխության ու գոտեպնդման 100-ավոր նամակներ ու գրառումներ ենք ստանում բազմաթիվ ընկերներից, հարազատներից ու անծանոթ մարդկանցից: Այսօր նաև Ազգային ժողովում մեր գործընկերները բարձրաձայնեցին մեր ու Մարության ընտանիքի դեմ հնչող ուղիղ սպառնալիքների հարցը, ինչի համար շնորհակալ ենք:

Մեզ «պատերազմ» հայտարարած նախկինների մնացուկներն ու իրենց սատելիտները հայհոյանքի, ստի ու հոգեբանական տեռորի միջոցով արդեն շուրջ 2 տարի է փորձում են մեզ հունից հանել: Սադրանքների ու փողոցային պրիմիտիվ չեկիստական այս վարքագիծը նոր չէ ու, ցավոք, ունենում է մասնակի հաջողություններ, սակայն վստահեցնում եմ՝ սրան շատ չի մնացել:

Անդաստիարակ այս պահվածքի առաջամարտիկները թող ականջներին օղ անեն՝ ՄԵՆՔ ամուր ենք ինչպես երբեք ու չենք ընկրկելու, ինչպես չենք ընկրկել իրենց հանցավոր իշխանության տարիներին: Շարունակե՛ք փորել ձեր փոսը, որքան խորը փորեք, այնքան ավելի ծանր եք վայր ընկնելու:

Իրավապահ համակարգից ակնկալում ենք շատ կոնկրետ, շուտափույթ արձագանք և գործողություններ, իսկ հարազատներին և ընկերներին կոչ անում զինվել համբերությամբ ու չտրվել սադրանքների: Ամեն ինչ լավ է լինելու...»: