«Մարդկային գործոնը չեմ բացառում, բայց պետք է իրականացվի համապատասխան փորձաքննություն». Ազգային գրադարանի տնօրեն

«Կորուստների չափի մասին տեղեկատվություն չենք կարող հրապարակել, դա կգնահատվի համապատասխան փորձաքննությունից հետո, բայց հստակ կարող ենք ասել, որ թվայնացված ամբողջ նյութը, ողջ բազան առանձին կրիչներով արխիվացված, պահված են»,- այսօր հրավիրած մամուլի ասուլիսի ժամանակ ասաց Ազգային գրադարանի տնօրեն Հրաչյա Սարիբեկյանը՝ անդրադառնալով թվայնացված արխիվի նյութերի կորստի վերաբերյալ հարցին:

Նրա խոսքով՝ դատելով սերվերային սարքերի արտաքին տեսքից և ելնելով մասնագետների զննումից, կարող են ասել, որ այդ ամբողջ ինֆորմացիան կարող է պահպանված լինել նաև սերվերներում: Ըստ տնօրենի՝ գրադարանում թվայնացված էին մինչև 20-րդ դարի նյութերը:

Ազգային գրադարանի ղեկավարությունը դիմել է Արտակարգ իրավիճակների նախարարությանը. պետք է համապատասխան փորձաքննություն կատարվի պարզելու՝ մարդկային միջամտությո՞ւն է եղել, թե՞ պատճառը տեխնածին է:

Հարցին՝ մարդկային գործոնը բացառո՞ւմ է, Հ. Սարիբեկյանն ասաց, որ ոչինչ չի բացառում:

Հիշեցնենք, նախօրեին Հայաստանի ազգային գրադարանը հաղորդագրություն էր տարածել՝ տեղեկացնելով, որ մայիսի 10-ին ինտերնետ կապի խափանման և ՀԱԳ էլեկտրոնային շտեմարանների առցանց անհասանելիության պատճառները պարզելու նպատակով ՀԱԳ աշխատակիցները շենքի պահպանությունն իրականացնող ոստիկաններից մեկի ուղեկցությամբ որոշ էլեկտրական սարքեր հայտնաբերել են ծխեցված վիճակում: Արտակարգ դրության պայմաններում գրադարանն աշխատել է միայն առցանց, իսկ սերվերները կարգավորվել են հեռավար կերպով: