«Միշտ կարելի է չարվածի պատասխանատվությունը թողնել քաղաքացու վրա». Բաբկեն Պիպոյան

«Իրազեկ և պաշտպանված սպառող» ՀԿ-ի նախագահ Բաբկեն Պիպոյանը ֆեյսբուքյան իր էջում գրել է. «Երբ մտնում ենք խանութ ու տեսնում ժամկետանց ապրանք, չենք ուրախանում, որ բազմաթիվ ապրանքներ ժամկետանց չեն: Երբ խանութում դրամարկղի մոտ պարզում ենք, որ ապրանքն ավելի թանկ է, քան ներկայացված էր գնապիտակով, չենք ուրախանում, որ մնացած ապրանքների գինը նորմալ էր: Երբ պատիրված կահույքը մեր պատվիրված չափսերին չի համապատասխանում, չենք ուրախանում, որ գույնով համապատասխանում է: Երբ գազը կամ բենզինը քիչ են լիցքավորում, չենք ուրախանում, որ «լավ է, գոնե չպայթեց»:
Երբ բանկը սահմանում է բարձր փաստացի տոկոսադրույք, չենք ուրախանում, որ «լավ է գոնե տալիս է»:
Եթե որոշել են բացել հանրային տրանսպորտը, ուրեմն պետք է խստագույնս հետևեն, որ չլինի մեկը, որ չի կրել դիմակ և ձեռնոց և ոչ թե միայն ուրախանալ, որ շատերը հետևել են հորդորին և կրել են:
Սոցիալական պատասխանատվության հարց կա, բայց վերահսկողների անելիքն ավելի շատ է:
Ժամկետանց ապրանք մի գնեք, բարձր տոկոսով վարկ մի վերցրեք, քարուքանդ եղած տրանսպորտ մի նստեք՝ միշտ կարելի է չարվածի պատասխանատվությունը թողնել քաղաքացու վրա»: