«Այս իշխանությունները տապալել են կորոնավիրուսի դեմ պայքարը». Արման Աբովյանը ևս դիմակ չէր կրում

Քիչ առաջ ԱԱԾ շենքի մոտ լրագրողների հետ իր ճեպազրույցում ԲՀԿ խմբակցության պատգամավոր Արման Աբովյանն իշխանություններին մեղադրեց կորոնավրուսի դեմ պայքարը տապալելու համար: «Ով ա պատասխան տալու մահերի, տասնյակ հազարավոր վարակվածների համար»,- ասաց նա:

Հատկանշական է, որ պատգամավորը և իր գործընկեր Գևորգ Պետրոսյանը և ԲՀԿ-ական այլ պատգամավորներ, դիմակ չէին կրում ու չէին պահպանում սոցիալական հեռավորությունը:

Միայն երբ լրագրողը հարց հնչեցրեց, թե մտավախություն չունե՞ն, որ այսքան կուտակումները կարող են վարակվածության ռիսկ պարունակել, Արման Աբովյանը դրեց իր դիմակը՝ պատճառաբանելով, որ այն թրջվել էր:

Երբ «Ազատության» լրագրողը հարց հնչեցրեց, որ նրա գործընկեր Գևորգ Պետրոսյանն այդպես էլ ամբողջ ժամանակ դիմակ չկրեց, Աբովյանը պատասխանեց. «Դե ես չէի էլ կասկածում, որ «Ազատության» լրագրողը կպաշտպանի ապօրինութունը»:

Նշենք, որ ժամեր առաջ իր առանձնատան դիմաց ելույթ ունենալու ընթացքում դիմակ չէր կրել նաև ԲՀԿ առաջնորդ Գագիկ Ծառուկյանը: