«Չգիտեք՝ էլ ի՞նչ անեք, որ վերականգնեք օլիգարխիկ համակարգը». Արթուր Հովհաննիսյան

«Իմ քայլը» խմբակցության պատգամավոր Արթուր Հովհաննիսյանը ֆեյսբուքյան իր էջում գրել է․ «Դուք խառնվել եք իրար, չգիտեք՝ էլ ինչ անեք, որ վերականգնեք օլիգարխիկ համակարգը Հայաստանում։

Ձեզ համար նպատակն արդարացնում է միջոցները, անգամ երբ այդ նպատակին հասնելու համար գործում եք ընդդեմ պետականության, ժողովրդի ու հայրենիքի։

Իսկ գիտեք՝ ինչո՞ւ։

Ձեզ համար չկան հայրենիք ու ժողովուրդ կամ ազգ հասկացությունները։

Ձեզ համար հայրենիքը պարզապես տարածք է, որի ռեսուրսները ծառայել են անձնական հարստություն դիզելու համար, իսկ ժողովուրդը պարզապես մարդիկ են, որոնց մասին հիշել եք միայն ընտրությունների ժամանակ։ Եվ դա կանեք նորից՝ առաջին իսկ հարմար առիթի դեպքում։

Բայց ում դուռն ուզում եք, ծեծեք՝ թե՛ դրսում, թե՛ ներսում, միևնույն է, ձեր հետևից գալու է արդարադատությունը։ Մենք պետք է մաքրենք և կմաքրենք մեր երկիրն ընդդիմադիր քաղաքական ուժերի քողի տակ թաքնված Հայաստանի պետականության դեմ ոտնձգություններ իրականացնողներից»։