«Ամեն մի մանրուքի դեպքում չպետք է դիմենք ՀԱՊԿ-ին». Սեյրան Օհանյան

«Երկիր մեդիա» հեռուստաընկերության եթերում պաշտպանության նախկին նախարար Սեյրան Օհանյանն անդրադարձել է վերջին շրջանում հայ-ադրբեջանական սահմանին տիրող լարված վիճակին:

«Մեկ դիրքի շուրջ ծավալված մարտական գործողությունների դեպքում, երբ նույնիսկ մեկ զորամասի ուժերով կարող ենք լուծել մարտական խնդիրը, և ամեն բախման կամ հակառակորդի սադրանքի, ամեն մանրուքի դեպքում մենք չպետք է դիմենք ՀԱՊԿ-ին»,- հայտարարել է նա:

Անդրադառնալով Ադրբեջանի ղեկավար Իլհամ Ալիևի վերջին հայտարարությանը՝ պաշտպանության նախկին նախարարն ասել է. «Երբ Ադրբեջանի նախագահ Իլհամ Ալիևը հայտարարում է, թե այ, եթե մենք դեմ առ դեմ մնանք Հայաստանի հետ, այն ժամանակ կտեսնեք, չի հասկանում կամ մոռանում է, որ նույնիսկ Արցախի Պաշտպանության բանակն է դեմ առ դեմ և միայնակ կռվել իրենց պետության դեմ և հաղթել։ Մոռանում է, որ նույնիսկ ազատամարտի տարիներին էր Ադրբեջանն օգտվում դրսի ուժերից. և՛ Թուրքիայից, և՛ Աֆղանստանից, և այլ երկրներից վարձկաններ բերում։ Մոռանում է, որ մեկ հատիկ դիրքի շուրջ ծավալված գործողությունների ժամանակ Թուրքիայի պաշտպանության նախարարը հայտարարեց Ադրբեջանին ամբողջական զորակցության մասին։ Որևէ միջազգային կառույց, այդ թվում ՀԱՊԿ-ն, դատապարտող հայտարարություն անելու համար պետք է ունենա լիարժեք տեղեկություններ, ո՞վ և ե՞րբ կրակեց։ Հայաստանն ու Արցախը մշտապես առաջարկել են ստեղծել վստահության մեխանիզմներ, ստուգելու հնարավորությամբ, այդ հարցը պարզելու համար։ Վիեննայի ու Սանկտ Պետերբուրգի պայմանավորվածություններն այդ նպատակով էին։ Իսկ Ադրբեջանը մշտապես հրաժարվել է։ Իմ պաշտոնավարման ժամանակ, պատահել է, հրահանգել եմ մեկ ամիս չկրակել, դա ընդունվել է որպես թուլության նշան, և մենք ստիպված անցել ենք պատժիչ գործողությունների, բայց Ադրբեջանի կրակոցների ու խախտումների մասին ամբողջական փաթեթներ ենք պատրաստել և տրամադրել միջազգային կառույցներին»:

Մանրամասները՝ տեսանյութում: