«Ռուսներն ազգայնականության նոր ալիքի սփռում թույլ չեն տա». Հայկ Խանումյան

Արցախի «Ազգային վերածնունդ» կուսակցության նախագահ Հայկ Խանումյանը ֆեյսբուքյան իր էջում գրել է. «Հետևելով Ռուսաստանում հայերի և ադրբեջանցիների միջև ծավալվող իրադարձություններին՝ երևում է, որ ռուսական իշխանություններն ամեն գնով՝ հատուկ ծառայություններով, իրավապահ համակարգով, երկու ժողովուրդների համայնքային կազմակերպություններով, օրենքով գողերով փորձում են կանխել պոգրոմները։ Ռուսները լավ են հասկանում, որ ԽՍՀՄ կործանումը հետևանք էր Սումգայիթի դեպքերի ժամանակ խորհրդային իշխանությունների անգործության, և ազգայնականության նոր ալիքի սփռում Ռուսաստանում թույլ չեն տա․ դա այսօր Ռուսաստանի ամենամեծ սպառնալիքն է։ Մենք էլ մեր կողմից պետք է ամեն ինչ անենք, որ Բաքվից հրահանգավորվող ադրբեջանական կառույցները, կազմակերպված խմբերը և ազդեցիկ դեմքերը լրջորեն պատժվեն, քանզի նրանց սադրանքները ոչ թե հայերի, այլ առավելապես Ռուսաստան պետության դեմ է ուղղված»: