«Անհասկանալի է նախագահի մոտեցումը ՍԴ դատավորի թեկնածու ընտրելու հարցում». Նիկոլայ Բաղդասարյան

ԱԺ «Իմ քայլը» խմբակցության պատգամավոր Նիկոլայ Բաղդասարյանն այսօր խմբակցության փակ նիտից հետո հայտնեց, որ պատգամավորները քննարկում են Սահմանադրական դատարանի դատավորների թեկնածուների հարցը:

Լրագրողների հետ զրույցում Բաղդասարյանը հայտնեց, որ խմբակցության միասնական կարծիք չկա թեկնածուների վերաբերյալ. «Տեսակետներ հնչեցրինք, փաստեր ներկայացրինք՝ դրական և բացասական, և յուրաքանչյուր պատգամավոր իր խղճի առաջ քվերակություն կկատարի՝ կողմ կամ դեմ»,- ասաց նա:

Ադրադառնալով ՍԴ դատավորի թեկնածուների անձերի շուրջ շրջանառվող տեղեկություններին և քննադատություններին՝ պատգամավորն ասաց. «Սա հերթական ընտրություններն են: Պետք չէ ծայրահեղականացնել՝ եթե ընտրվի այս թեկնածուն, ապա այսպես կլինի, կամ այնպես կլինի, ես ստեղ ոչ մի ծայրահեղական բան չեմ տեսնում, ուղղակի պետք է մենք մեզ համար սահմանենք չափանիշներ և ըստ այդմ որոշում կայացնենք»:

Անդրադարձ կատարելով ՀՀ նախագահի կողմից երեկ առաջադրված Արթուր Վաղարշյանի թեկնածությանը և այն հանգամանքին, որ արդեն մի անգամ ԱԺ-ն մերժել էր վերջինի թեկնածությունը՝ Նիկոլայ Բաղդասարյանն ասաց. «Ստեղ մոտեցման խնդիրն է, սկզբունքը հետևյալն է. երբ ԱԺ-ն որոշակի սկզբունքների հիման վրա է որոշում կայացնում: Եթե թեկնածուն համապատասխան ստանդարտներին չի համապատասխանում, ես իմ որոշումն ինչպե՞ս կարամ փոխեմ, եթե ես քվեարկել եմ մի ձև, նույն ձև էլ վաղն եմ քվեարկելու, որովհետև, ի վերջո, այդ մարդու կյանքում և չափանիշներում ինչ-որ բան չի փոխվել: Անհասկանալի ա նախագահի մոտեցումը, որ նույն թեկնածուին ինքն առաջադրում է՝ հասկանալով, որ ընտրողը նույնն է և այդ ընտրողն արդեն իր որոշումը կայացրել է»: