«Կորոնավիրուսի դեմ պայքարում հույսի կանաչ ծիլեր կան»․ ԱՀԿ

Առողջապահության համաշխարհային կազմակերպության (ԱՀԿ) ղեկավար Թեդրոս Ադհան Գեբրեյեսուսը, Ժնևում՝ գործակալության շտաբում հրավիրված ասուլիսի ժամանակ հայտարարել է, որ կորոնավիրուսի դեմ պայքարում հույսի շողեր կան, չնայած որ աշխարհում վարակման մոտ 20 միլիոն դեպք կա, իսկ մահվան դեպքերի թիվը մոտենում է 750 000-ի: Այս մասին հայտնում է ԱՀԿ մամուլի ծառայությունը:
«Տեղյակ եմ, որ ձեզանից շատերը սգում են, ու սա աշխարհի համար դժվար պահ է»,-ասել է ԱՀԿ գլխավոր տնօրենը: «Սակայն ուզում եմ հստակություն մտցնել՝ կան հույսի կանաչ ծիլեր, ու անկախ նրանից, թե որտեղ է գտնվում երկիրը, տարածաշրջանը, քաղաքը կամ ավանը, երբեք ուշ չէ Covid-19-ի բռնկմանը դիմադրելու համար։ Մեկոնգ շրջանի մի քանի երկրներ, Նոր Զելանդիան, Ռուանդան և Կարիբյան ավազանի և Խաղաղ օվկիանոսյան կղզու շատ պետություններ կարողացել են հաղթահարել համավարակը վաղ փուլում»,-հավելել է նա: Գեբրեյեսուսն օրինակ է բերել Նոր Զելանդիային, թե ինչպես է պետք հակազդել կորոնավիրուսին: Մասնավորապես, հանգստյան օրերի ընթացքում Նոր Զելանդիայի վարչապետ Ժասինդա Արդերը նշել է, որ 100 օր է, ինչ երկրի ներսում չի հայտնաբերվել նոր՝ «դրսից եկող» վարակակիրներ։