«Որևէ կերպ չի կարելի համեմատել Ապրիլյան քառօրյան ու Տավուշի իրադարձությունները». ՀՀ երրորդ նախագահ

ՀՀ նախկին նախագահ Սերժ Սարգսյանն ասուլիսի ժամանակ անդրադարձավ նաև հուլիսին Տավուշի սահմանագոտում հայ-ադրբեջանական բախումների մասին հարցին: «Որևէ կերպ չի կարելի համեմատել ապրիլյան քառօրյան ու Տավուշի իրադարձությունները: Տավուշում մեր ԶՈՒ-ն իրեն լավագույնս դրսևորեց ու կատարեց չափազանց կարևոր խնդիր: Սա պետք է գնահատել, բայց նույնը պետք էր անել 2018-ի մայիս-հունիսին՝ Նախիջևանի ուղղությամբ. դա անհրաժեշտություն էր... Նաև մի փոքր պետք է տեղեկացված լինեինք, թե հատկապես ո՞ր սխրագործության համար էին 70 հոգին պարգևատրվել «Մարտական խաչ» բարձր շքանշանով: 1994-ի հրադադարից հետո, երբ առաջին անգամ ՀՀ առաջին նախագահն ի մի էր բերում նախորդ չորս տարիների ռազմական գործողություններն ու դրանցում ակտիվ մասնակցություն ունեցողներին, ընդամենը երկու տասնյակ հոգի պարգևատրվեցին «Մարտական խաչ»-ով: Ես սա որևէ մեկին կշտամբելու համար չեմ ասում: Տարբերությունը մեծ է, մի բան է՝ լայնածավալ գործողություններ, որ մղվում էին 200 կմ-ից ավելի հատվածում, մեկ այլ բան՝ մարտական բախում, որ տեղի է ունենում մի քանի հարյուր մեր հատվածներում: Շատ ուրախ եմ, որ հերթական անգամ մեր ԶՈՒ-ն իրեն ցուցաբերեց լավագույնս: Գոնե հիմա որևէ մեկը չի կարող ասել, որ մարտունակ չեն»: