«Զրուցել եմ Կարեն Կարապետյանի հետ, խոստովանել է, որ դա վրիպում էր». Սերժ Սարգսյան

«Այո՛, իհարկե ես զրուցել եմ Կարեն Կարապետյանի հետ, և նա խոստովանել է, որ դա վրիպում էր»,- այս մասին հրավիրված ասուլիսին հայտարարեց ՀՀ երրորդ նախագահ Սերժ Սարգսյանը՝ անդրադառնալով այդ ժամանակվա վարչապետ Կարեն Կարապետյանի հայտարարությանը: «Երբ նա եղել է Արցախում, որոշ մարդիկ ասել են, որ միգուցե այսպիսի խնդիր է եղել, հետո ստուգմամբ պարզվել է, որ նման բան չի եղել: Այնպես որ, դա թյուրիմացություն է եղել»,- արձագանքել է Սարգսյանը:

Հիշեցնենք, որ նախկին վարչապետ Կարեն Կարապետյանը Կառավարություն-ԱԺ հարցուպատասխաններից մեկի ժամանակ հայտնել էր հետևյալը. «Ունենք կասկած, որ վառարանային վառելիքը հետո գնում է, կերոսինի հետ խառնվում է, և մենք շուկայում ունենում ենք անորակ նավթամթերք: Դուք շատ լավ հիշում եք, որ ապրիլյան դեպքերի ժամանակ մենք ունեինք բազմաթիվ դեպքեր, երբ որ մեր ռազմական տեխնիկան չէր աշխատում հենց դրա պատճառով»: