«Մարտի 1-ի» գործով տուժողների իրավահաջորդների դատական հայցի քննությունը հետաձգվեց

Այսօր՝ օգոստոսի 19-ին, Երևանի ընդհանուր իրավասության դատարանի Էրեբունու նստավայրում նախատեսված էր Մարտի 1-ի զոհերի իրավահաջորդների դատական հայցի քննությունը՝ ընդդեմ Արցախյան պատերազմում զոհված ազատամարտիկների իրավահաջորդների, սակայն նիստը հետաձգվեց՝ հայցվորների բացակայության պատճառով։

Հաջորդ դատական նիստը տեղի կունենա սեպտեմբերի 7-ին, ժամը 14։30-ին։

Նշենք, որ «Մարտի 1»-ի գործով տուժողների իրավահաջորդները սևազգեստ մայրերի դեմ դատական հայց են ներկայացրել։

Փաստաբան Ալեքսանդր Կոչուբաևը հայտնել էր, որ հայցի հիմքում ընկած է «Զինվորի մայր» ՀԿ նախագահ Մարգարիտա Խաչատրյանի այն արտահայտությունները, որ ինչո՞ւ, օրինակ, զոհված զինծառայողներին կամ «Սասնա ծռերի» գործողությունների հետևանքով մահացած ոստիկանության ծառայողներին, ինչպես նաև, առհասարակ, հայրենիքին մատուցած ծառայությունների ընթացքում մահացած անձանց ընտանիքներին փոխհատուցում չի տրամադրվում, իսկ Մարտի 1-ի զոհերի իրավահաջորդներին տրամադրվում է։