«Եթե այս սկանդալը ճիշտ է, ապա ԱԱԾ-ն ոչ միայն ՀՀ սահմանադրությունն է խախտում, այլև՝ ԱՄՆ դաշնային օրենքը». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Եթե այս ամբողջ սկանդալը ճիշտ է, ապա ԱԱԾ-ն ոչ միայն Հայաստանի Հանրապետության սահմանադրությունն է խախտում, այլև՝ ԱՄՆ դաշնային օրենքը, համաձայն որի ամերիկյան յուրաքանչյուր տեխնոլոգիական ընկերության համակարգ՝ հաք անելու միջոցով ներթափանցելը դաշնային, միջազգային քրեական հանցագործություն է: Խոսքը վերաբերում է նաև այդ համակարգերի մասնավոր օգտատերերի օգտահաշիվներին:

Բայց դա դեռ մի կողմ:

Ես դեռևս ամիսներ առաջ էի կանխատեսել, որ կորոնավիրուսային ֆիասկոն բարդվելու է Արսեն Թորոսյանի վրա՝ նրան դարձնելով քավության նոխազ:

Դա նախևառաջ Փաշինյանին հատուկ գործելակերպ է. սեփական քաղաքականության և անթույլատրելի անգործության ողբերգական հետևանքների պատասխանատվությունը մշտապես սեփական ուսերից նետել այլոց վրա և դրանով մաքրագործվել չմտածող զանգվածների աչքում:

Եթե այս ամենը ճիշտ է, ապա Արսեն Թորոսյանին քննադատելուց առաջ պետք է հասկանանք, որ դրանով մենք մտնում ենք մի կեղտոտ գործընթացի մեջ, որի վերջնական նպատակը մեր հիմարեցումն է երկրի ղեկին կանգնած մարդու կողմից:

Թորոսյանի անձը կարևոր չէ: Այն նաև իր նշանակությամբ է անկարևոր եղել Հայաստանի քաղաքական դաշտում: Բազում աններելի սխալները, որ կարող է գործած լինել Առողջապահության նախարարը՝ մեծ համապատկերում պետք է տարանջատվեն այն առավել մեծ հարցերից, որոնցում առաջնային մեղավորը ոչ թե առողջապահական այդ ոչ պոպուլյար կատարածու-չինովնիկն է, այլ այն մարդը, որ թե՛ նրա գործողությունների և թե՛ իրականացրած քաղաքականության հիմնական, առաջնային և երբեմն անգամ միակ պատասխանատուն է:

Իսկ այդ մարդն այն մարդն է, որը, ըստ հայկական մամուլի, սեփական հատուկ ծառայություններին փաստորեն ուղղորդում է խախտել ոչ միայն միջազգային ընդդատյայություն ունեցող օրենքներ, այլև՝ սեփական սահմանադրությունն ու օրենսդրությունը: Եվ որ ամենակարևորն է՝ մարդու անձնական կյանքի անձեռնմխելիության սկզբունքն ու անձնական կյանքի իրավունքի բարոյական տիրույթը:

Ուրեմն՝ չտրվե՛նք երկրի կառավարչի էժան հնարքին և բոլոր սլաքները չուղղե՛նք մեկին, որ ընդամենը գործիք է եղել մի խաղում, որ նրա ղեկավարն է վարել՝ դրանով ազատելով հենց նույն ղեկավարին՝ պատասխանատվության իր ամենակարևոր բաժնից»: