«Կանգառում դիմակս իջեցրի, որ շունչ քաշեմ, մի ոստիկան ծլեց՝ դիմակը բերանին». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրել է. «Ավտոբուսի վարորդն առանց դիմակի էր: Հենց երկրորդ զանգվածից դուրս եկավ, մտավ Գայի պողոտա, սիգարետը վառեց. հանկարծ կանգնեցնեն, կասի՝ ծխում եմ: Հասանք Կենդանաբանական այգու կողմերը, զանգեց ինչ-որ մեկին, սիգարետը՝ աջ ձեռքին, հեռախոսը՝ ձախ, իջնում ենք քաղաք: Դե, ինքը հմուտ վարորդ է՝ կարող է ափի եզրով էլ վարել: Ճանապարհին մտածում եմ՝ ասեմ-չասեմ, երկու օր առաջվա դեպքն եմ հիշում, որ երթուղային բարձրացող երկու տղամարդու ասեցի, մեկը քիչ էր մնում ձեռքն աչքս մտցներ, չասեցի: Գյուղինստիտուտի կանգառում իջա, դիմակս իջեցրի, որ շունչ քաշեմ, մի ոստիկան չգիտես որ ծառի տակից ծլեց՝ դիմակը բերանին.

-Հարգելի քաղաքացի, ինչո՞ւ դիմակ չունեք:
-Հարգելի ոստիկան, ես ծխող ու անդիմակ վարորդից հետո ուշքի եմ գալիս, իսկ ո՞ւր է ձեր դիմակը:
Անակնկալի եկած քիթը ծածկում է.
-Կներեք, մի պահ...
-Այ, էդ մի պահն ինձ էլ էր այցելել:
-Այսինքն..
-Հենց հասկանաք, կշարունակենք: Բարի ծառայություն, հարգելի ոստիկան, զգույշ եղեք, կորոնավիրուս կա, բան կա...»: