«Սա ծանր և երկարատև հետևանքներ է ունենալու». Լևոն Բարսեղյան

«Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը ֆեյսբուքյան իր էջում գրել է. «Հին մարտահրավեր նոր իշխանությունների համար

Մազ էր մնացել՝ մոռանայի, հարգելի՛ պատգամավորներ, Հայաստանի մեկ համայնքում մանկապարտեզներն անվճար են, մոտավորապես 80 համայնքում՝ վճարովի, էն մնացած 420 համայնքում մանկապարտեզ չկա, մթոմ էդ երեխաները մեղավոր են, որ էդ համայնքներում են ծնվել: Սա կրկնակի խտրականություն է, հակասահմանադրական է, դիտավոր, անհավասար և անարդար բան է: Սա ծանր և երկարատև հետևանքներ է ունենալու, շատ եմ գրել այդ մասին:

Սերժիկների ժամանակ էլ եմ գրել, վերջին երկու տարում էլ: Այդ անարդարությունը կարգի բերելու համար շատ բան պետք չէ, մի քանի պատգամավոր, կամ մեկ պատգամավոր օրենք է գրում, ընդունում են սեպտեմբերի կեսերին, արագացված, մեկ օրում՝ 3-4 ընթերցմամբ, ու մյուս տարվա սկզբից բոլոր մանկապարտեզահասակ երեխաների համար հավասար հնարավորություններ են ստեղծվում, կամ բոլորը գնում են մանկապարտեզ անվճար, կամ բոլորը՝ վճարովի, բայց բոլորի համար մանկապարտեզները պիտի հասանելի լինեն, որ համայնքում չկա մանկապարտեզ՝ արժանապատիվ տրանսպորտի հարց է լուծվում սկզբի համար, որ անվտանգ ու ապահով տանեն-բերեն, հետո արդեն այլ լուծումներ կմշակեք:

Չասեք, թե անհնար է 4 ամսում այդ հարցը լուծել:

Հեղափոխությունը եղել է, որ 4-40 տարվա անելիքն ու չարածը 4 ամսում լուծվի: Ով չի հավատում, գրեք ցածը:

Սա պետության զավթված լինելու հանգամանքին քաղաքական գնահատական տալու պահանջ չէ, ոչ մի խուճապ: Սա հասարակ մի խնդիր է, որ պիտի լուծեք»: