«Պաշտոնատար անձինք թող իրենց ականջներին օղ անեն». Նորայր Նորիկյան

Փաստաբան Նորայր Նորիկյանը ֆեյսբուքյան իր էջում գրել է. «Արմավիրի մարզում մեկ օրվա ընթացքում 12 մարդ է մահացել, որից 10-ը՝ թունավորումից, 2-ը՝ պայթյունից...
Եվ ո՛չ մի անհանգստություն, պետական մարմինների կողմից պատշաճ տեղեկատվություն, կառավարության անունից պաշտոնատար անձանց բացատրություններ, հրատապ նիստեր, իրավիճակի վերլուծություն:

Ի՞նչ է սա, եթե ոչ արտակարգ իրավիճակ, առնվազն Արմավիրի մարզում:

...Մենք ոչ միայն պետական կառավարման արդյունավետության խնդիր ունենք, այլև սրտացավության, ուշադրության, օպերատիվության պակասի, խնդիրների ընկալման ու լուծման, վերջապես՝ սիրելի՛ քաղաքացիների իրավունքերի հարգման ու պաշտպանության:

Միայն խոսելը քիչ է:

Պաշտոնատար անձինք թող իրենց ականջներին օղ անեն, որ ՀՀ սահմանադրության 3-րդ հոդվածի համաձայն՝
1. Հայաստանի Հանրապետությունում մարդը բարձրագույն արժեք է: Մարդու անօտարելի արժանապատվությունն իր իրավունքների և ազատությունների անքակտելի հիմքն է:

2. Մարդու և քաղաքացու հիմնական իրավունքների և ազատությունների հարգումն ու պաշտպանությունը հանրային իշխանության պարտականություններն են:

Երազի իմ երկիր հայրենի...»: