«ՊՎԾ-ի ստուգումների արդյունքներն իմ մտավախությունները հաստատել են». Էդուարդ Աղաջանյան

«Ազատություն» հաղորդաշարի եթերում ՀՀ վարչապետի աշխատակազմի ղեկավար Էդուարդ Աղաջանյանը՝ անդրադառնալով կառավարության թիվ մեկ առանձնատան վերանորոգման ժամանակ ենթադրյալ չարաշահումներին և այդ ամենին պատգամավոր Հրաչյա Հակոբյանի առնչության հարցին, ասել է. «Ես եմ դիմել ՊՎԾ-ին, քանի որ պահանջվող գումարից ավելին ծախսելու ենթադրյալ ռիսկեր են նկատվել։ ՊՎԾ-ի ստուգումների արդյունքներն իմ մտավախությունները հաստատել են, ես էլ հորդորել եմ այդ գործն ուղարկել իրավապահ մարմիններին, ինչը տեղի է ունեցել։ Նշվում էր 250 միլիոն դրամի մասին, ասեմ, որ այդ թիվն ուռճացված է, հնարավոր է՝ այդ գումարից ավելի պակաս է ծախսվել նորոգման համար։ Ինչ վերաբերում է Հրաչյա Հակոբյանին, դա հերթական աբսուրդային միտքն էր, որը լրատվամիջոցներից մեկն էր դրել շրջանառության մեջ։ Նա որևէ աղերս չունի այդ գործի հետ, այդ թվում՝ կապալառու ընկերության հետ»:

Անդրադառնալով պարգևավճարների թեմային, Աղաջանյանը նշել է. «Դա բովանդակային առումով ոչ թե աշխատողի լավ ու վատ աշխատելու արդյունքն է, այլ դրա հիմքում ընկած է սոցիալական խնդիր...Այսինքն, մենք սրանով կոնկրետ աշխատավարձի խնդիր ենք լուծում, ոչ թե տվյալ աշխատողի լավ կամ վատ աշխատելը: Պարգևավճարների կտրումը կնշանակի աշխատավարձի կրճատում, որը ի դեպ տեղի է ունեցել, այս օրերին չեն տրվել և այդ գումարը տրամադրվել է կորոնավիրուսի դեմ պայքարին»,- ասել է նա: