«Կիրականացնե՞ք գործարք՝ «շինթույլտվություն՝ Կամազների դիմաց»». Խաժակյանը՝ Ներսեսյանին

Այսօր՝ Երևանի ավագանու նիստում «Լույս» խմբակցության ղեկավար Դավիթ Խաժակյանը Երևանի փոխքաղաքապետի թեկնածու Սերգեյ Ներսեսյանից հետաքրքրվեց. «Նախկին փոխքաղաքապետ Հայկ Սարգսյանն իր պաշտոնավարման ընթացքում իրականացրել է մի շարք գործառույթներ, որոնք հանրության մեջ հայտնի են «շինթույլտվություն՝ «Կամազների» դիմաց, եթե նման խնդիր առաջադրվի քաղաքապետի կողմից, կհամաձայնե՞ք իրականացնել այդ գործառույթը, թե՞ ոչ»:

Ի պատասխան Ս. Ներսեսյանն ասաց. «Ցանկացած հանձնարարական իմ վերադասի կողմից, որը չի խախտում մեր օրենսդրական պահանջները, միանշանակ, արվելու է»:

Թեհմինա Վարդանյանը, լրացնելով Դավիթ Խաժակյանի խոսքը, ասաց. «Իմ գործընկերը նկատի ուներ, թե խոսակցություններ էին պտտվում, որ նախկին փոխքաղաքապետ Հայկ Սարգսյանն իր աշխատասենյակում տեսանյութեր էր նկարում՝ մեծ կառուցապատողներին պարտավորեցնելով ինչ-ինչ բաներ: Պարոն Խաժակյանի հարցին Դուք պատասխանեցիք այնքանով՝ որքանով, մենք հետամուտ ենք լինելու և ուշադիր»: