Իրանում հայտարարել են կորոնավիրուսի երրորդ ալիքի մասին

Կորոնավիրուսի տարածման երրորդ ալիքն է սկսվել Իրանի Թեհրան նահանգում: Այս մասին հայտարարել է նահանգում վիրուսի տարածմանը հակազդելու շտաբի ղեկավար Ալիրեզա Զալին։
«Վերջին օրերի վիճակագրությունը ցույց է տալիս, որ Թեհրանում արդեն սկսվել է երրորդ ալիքը»,- ասել է Զալին։
Նա հավելել է, որ «երկրորդ և երրորդ ալիքի միջև ժամանակահատվածը շատ աննշան է եղել»:
Նա հստակեցրել է, որ նկատվում է վիճակագրական ցուցանիշների աճ, որը համապատասխանում է երրորդ ալիքին։ «Մենք առողջապահության նախարարին նամակ ենք ուղարկել՝ Թեհրանում կորոնավիրուսի տարածմանը հակազդելու շտաբի անունից՝ խնդրելով վերադարձնել վիրուսի հետ կապված սահմանափակումները։ Դա հատկապես վերաբերում է աշխատանքի հեռահար ձևաչափին»,- հավելել է Զալին։
Հիշեցնենք, որ Իրանում կորոնավիրուսի երկրորդ ալիքի տարածման մասին պաշտոնապես հայտարարվել է հուլիսի 15-ին: