«Պետք է մի կողմ թողնել ներքաղաքական քենն ու հաշվարկները». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Անհրաժեշտ է այս իրավիճակում մի կողմ թողնել ներքաղաքական քենն ու հաշվարկները և գնալ հաշտեցման ճանապարհով, համագործակցության ուղով և օգտագործել, առանց բացառության, բոլոր ռեսուրսները: Սա անգամ «հեղափոխություն» չէ, որտեղ կլանայնություն, այնուամենայնիվ, կար:
Սա պատերազմ է՝ հայրենական պատերազմ:
Եվ այս խոսքերն ուղղված չեն ընդդիմությանը, ինչպես դա անում են ոմանք: Այս կոչն ուղղված է քաղաքական իշխանություններին:
Եթե անգամ իշխանությունները մտածում են, որ «Սասնա Ծռեր»-ը կամ այլ ընդդիմադիր անձինք ու ուժեր, գնալով ռազմաճակատ, կարող են հետպատերազմական շրջանում քաղաքական առումով առավել շահեկան դիրքերում հայտնվել, եթե անգամ իշխանությունները սխալաբար մտածում են, որ այդ ուժերը, հետ գալով, կարող են իրենց քաղաքական իշխանության համար քաղաքական սպառնալիք դառնալ, պետք է այդ բոլոր վախերն ու քենը մի կողմ թողնեն և հանուն հայրենիքի փրկության միավորվեն:
Արյան մեջ եղբայր ենք բոլորս։
Փոխարենն ընտրվել է այդ ուժերին անտեսելու վարքագիծ, որի արդյունքում Արցախի փակ անցակետերի պայմաններում կամավորների այդ խմբերը չունեն հնարավորություն ռազմաճակատ հասնելու:
Սա մեր կյանքի և մահվան հարցն է: Մենք հիմա քաղաքականությամբ զբաղվելու իրավունք չունենք:
Ավելին՝ անհրաժեշտ է բանտերից ազատ արձակել դատապարտյալների գերակշիռ մասին՝ պայմանով, որ բոլորը կգնան ամենածանր հատվածներ՝ մինչև հաղթական ավարտ կռվելու: Այդպես են արել բազում պետություններ։ Այդպես պետք է անենք և մենք։ Եվ իհարկե, անհրաժեշտ է անմիջապես ազատել բանտից Սերժ Սարգսյանի ռեժիմի դեմ ապստամբածներին, որպեսզի նրանք նույնպես հնարավորություն ստանան մասնակցել հայրենիքի փրկությանը: Բոլորին։
Թանկ է մեր ամեն կյանք, թշնամու մահ է մեր ամեն զինվոր:
Եկել է իսկական միասնության պահը»: