«Նվիրատվությունների ներկայիս հոսքը չի ծածկում պատերազմի ծախսերը». Էդուարդ Ավետիսյան

Երևանի ավագանու անդամ Էդուարդ Ավետիսյանը ֆեյսբուքյան իր էջում գրել է. «Պատերազմի սկսվելուց ի վեր «Հայաստան» համահայկական հիմնադրամին նվիրաբերվել է շուրջ 25 միլիոն դոլար։ 10 միլիոնանոց ազգի համար, որի բանակը ամենօրյա ինտենսիվ մարտեր է վարում, սա չնչին գումար է։ Պատերազմ վարելը օրական տասնյակ միլիոնավոր դոլարներ արժե, այսինքն՝ նվիրատվությունների ներկայիս հոսքը չի ծածկում այս ծախսերը։ Սա նշանակում է, որ գործողության մեջ գտնվող բանակի երկարաժամկետ ծախսերը ապահովված չեն ու եթե այս պատերազմը երկար տևի, բանակին գումար է ուղղվելու պետական այլ ծախսերի կամ տնտեսության հաշվին։
Արդեն բազմիցս ասվել է, որ բանակին սնունդ պետք չէ, բայց շատերը դեռ խանութից առևտուր են անում ու դնում են արկղերի մեջ։ Այս սնունդը հաճախ շաբաթներով մնում է պահեստներում, որովհետև այն չափից շատ է։ Նույն գումարը ավելի լավ է նվիրաբերվի հիմնադրամին, որպեսզի գումարը ինստիտուցիոնալ կերպով հասնի ուր որ պետք է՝ լինի դա ջրի, սննդի, հագուստի թե սպառազինության տեսքով։
Շատ են գրառումներ անում, թե բա՝ ի ցույց մի դրեք ձեր արածը, սուս ու փուս արեք ձեր անելիքը։ Չէ, ընկերներ։ Մարդը սոցիալական ու էմոցիոնալ էակ է։ Շատ կարևոր է, որ մարդիկ տեսնեն, թե մյուսները ինչ են անում ու ոգեշնչվեն դրանից։ Օրինակը վարակիչ է։ Մեր ֆեյսբուքահայության մեջ էլ հո տեսնում ենք, թե բազմաթիվ ֆլեշմոբներ կամա թե ակամա ոնց են տարածվում քովիդի պես։ Եկեք էս անգամ կարևոր ու օգտակար բանը տարածենք։
Նվիրաբերեք, նկարեք ձեր նվիրատվությունը, տարածեք այն ձեր սոցիալական ցանցերով ու կոչ արեք մյուսներին նույնպես նվիրաբերել։ Որպեսզի սա չդառնա մրցույթ, թե ով ավելի մեծ «Իսկանդեր» ունի, կարող եք փակել նվիրաբերված գումարի չափը։ Բայց ցույց տվեք, որ ձեր բաժին նվիրատվությունը արել եք ու ձեր օրինակով վարակեք մյուսներին։
Նվիրաբերումները կատարվում են «Հայաստան» համահայկական հիմնադրամի կայքի միջոցով՝ himnadram.org։ Հնարավոր է նաև փոխանցում անել անմիջապես էլեկտրոնային դրամապանակների միջից, ինչպիսիք են Idram Payment System ու Telcell:
Մեծ հարգանք բոլորին, ովքեր իրենց հնարավորության չափով գեթ մեկ լումայի ներդրում են ունենում այս գործում»: