«Իրենց սայթերում գրել էին՝ Աիդա Սերոբյանը պատերազմի ժամանակ ադրբեջանցի երեխեքին սալյարկա է սրսկել». Սերոբյան

«Սա 90-ականների պատերազմը չէ: Այսօր արդեն վճռվում է ոչ թե Արցախի հարցը, այլ՝ հայ լինել-չլինելու: Մենք այդքան երիտասարդների արյուն ենք հեղել Արցախում, հո չե՞նք կարող թողնել, որ էդ երեխաների նահատակվելն իզուր անցնի»,- այսօրվա ասուլիսում ասաց Արցախյան ազատամարտի մասնակից, գնդապետ Աիդա Սերոբյանը՝ կոչ անելով բոլորին՝ կին թե տղամարդ, զենք վերցնել և գնալ հայրենիքը պաշտպանելու:
Աիդա Սերոբյանի համոզմամբ՝ պիտի այս հարցը ուժի միջոցով լուծել, քանի որ Ալիևն անգամ իր ձեռքով ստորագրած հրադադարի պայմանավորվածությունը չի պահել:
«Ադրբեջանը սուտ պրոպագանդաներ է անում: Օրինակ՝ դրել էին Ամերիկայի երկվորյակ երկնաքերերը ու գրել էին, որ հայերը ռմբակոծեցին Գյանջան: Կամ իմ նկարը դրել էին իրենց սայթերում ու գրել էին՝ «Բայեվիկ» տեռորիստ Աիդա Սերոբյանը պատերազմի ժամանակ մեր երեխաներին սալյարկա է սրսկել...»,- ծիծաղելով ասաց նա և հիշեց, որ Կարմիր խաչը տեսանյութ էր հրապարակել, որում հայտնել էր, որ բժիշկ Աիդա Սերոբյանն Արցախյան պատերազմի ժամանակ առաջին բուժօգնություն է ցույց տվել բազմաթիվ ադրբեջանցի զինվորների: