«Թող ՄԱԿ-ը հաշվի նստի հայերի հետ. այլևս չե՛նք լռելու և չե՛նք խնդրելու». ցուցարարներ

«Միացյալ ազգերի կազմակերպությունը, տպավորություն է, թե վաղուց էր մահացած, պարզապես մենք նրան նոր ենք գտել և հիմա ենք ի հիշատակ իրեն, հարգանքի տուրք մատուցում»,- ասում են ՄԱԿ-ի հայաստանյան ներկայացուցչության դիմաց բողոքի ակցիա իրականացնող քաղաքացիները:

Ինչպես ավելի վաղ հայտնել էինք, ցուցարարները ծաղկեպսակ են դրել ՄԱԿ-ի գրասենյակի դիմաց:

Նրանք ՄԱԿ-ից կոնկրետ գործողություններ են պահանջում Արցախում տեղի ունեցող իրադարձությունների վերաբերյալ, ինչպես նաև՝ Ադրբեջանի և Թուրքիայի կողմից սանձազերծած պատերազմի ուղղությամբ՝ պնդելով, որ ՄԱԿ-ի կոչերն ու դատապարտումները ոչ մի ազդեցություն չեն ունենում և անհրաժեշտ է գործնական քայլեր ձեռնարկել:

«Ամբողջ աշխարհին պարզ է, թե ինչ է կատարվում և մի փաստ արձանագրել, որ ընդամենը ՄԱԿ-ը պետք է զսպվածության կամ հրադադարի կոչը անի՞ և դա հարգե՞ն: Դա բացարձակապես ծաղրի ենթակա վիճակ է: Մենք՝ հայերս շատ վիրավորված ենք: Սա ամենամեղմ պատասխանն է (նկատի ունի ծաղկեպսակների տեղադրումը,- խմբ.): Թող իրենք հաշվի նստեն հայ հասարակության հետ: Մենք այլևս լռողի և խնդրողի կարգավիճակում չենք լինելու, այսուհետ թող իրենք ի գիտություն ընդունեն այս ամենը: Շատ ավելի լուրջ է մեր վերաբերմունքն իրենց նկատմամբ՝ վատ առումով»,- ասում են ցուցարարները: