Առաջարկվել է զինծառայողների ապահովագրության հիմնադրամին վճարվող ամսական 1000 դրամը 3000 դարձնել

ՀՀ պաշտպանության նախարարությունն առաջարկում է Զինծառայողների ապահովագրության հիմնադրամին վճարվող դրոշմանիշային վճարներն ամսական 1000 դրամից դարձնել 3000 դրամ։ Համապատասխան նախագիծն արդեն քննարկման է դրվել։

Նախագծի մշակումը պայմանավորված է 2020 թվականի սեպտեմբերի 27-ին Ադրբեջանի Հանրապետության կողմից Արցախի Հանրապետության վրա կատարված հարձակման հանգամանքով, որի հետևանքով Զինծառայողների ապահովագրության հիմնադրամի շահառուների թիվը աճել է։

Գործող օրենքով դրոշմանիշային վճարի չափը կազմում է ֆիզիկական անձանց համար՝ ամսական 1000 ՀՀ դրամ, իսկ անհատ ձեռնարկատերերի եւ նոտարների համար՝ տարեկան 12000 ՀՀ դրամ։ Այս դեպքում անհատների համար ամսական դառնում է 3000 դրամ, իսկ ԱՁ-ների եւ նոտարների համար՝ 36 հազար դրամ տարեկան, քանի որ նրանք տարեկան են վճարումը կատարում։

Նախագծերը մշակվել է ՀՀ Կենտրոնական բանկի կողմից՝ համագործակցելով ՀՀ պաշտպանության նախարարության, ՀՀ ֆինանսների նախարարության եւ Զինծառայողների ապահովագրության հիմնադրամի հետ։

Օրենքն ընդունվելու դեպքում ուժի մեջ է մտնում 2021 թվականի հունվարի 1-ից։

Հիշեցնենք, որ նախագծի վերաբերյալ ՀՀ Կառավարությունը և պատգամավորները քննարկումներ էին սկսել նախորդ շաբաթ։