«Պատերազմը վեր հանեց Հայաստանի ազգային անվտանգության համակարգի խոցելիությունը». Նարինե Դիլբարյան

«Ժառանգություն» կուսակցության նախագահ Նարինե Դիլբարյանը ֆեյսբուքյան իր էջում գրել է. «Այս գոյաբանական պատերազմը վեր հանեց Հայաստանի ազգային անվտանգության համակարգի խոցելիությունը, կախյալությունը, տասնամյակներ շարունակ անտեսեցինք և ինքնահոսի մատնեցինք արտաքին հետախուզության, հակահետախուզության աշխատանքները, խորապես թերագնահատվեցին մասնագիտական որակները: Տարբեր անձեր, ԱԱԾ տարբեր օղակներում արագընթաց գնդապետ ու գեներալ դարձան, բայց ոլորտի մասնագետ բնականաբար՝ ոչ: Թուրք-ադրբեջանական լայնածավալ ագրեսիան ցույց տվեց, թե որքան օտար ներթափանցումներ, ցանցեր գորոծունեություն են ծավալում Հայաստանից մինչև Արցախ, մեր սահմանները դյուրաբեկ են: Թշնամին մեր մասին շատ բան գիտե: ԱԱԾ նոր պետի նշանակումը գուցե դառնա սթափեցնող հանգրվան, Արմեն Աբազյանի մասնագիտական ճանապարհը իբրև կադրային զինվորականի մասնագիտական գործունեության տարբեր աստիճաններով գուցե նախանշի զգոնության ճանապարհը: Ի վերջո, կբացվի Հայաստանում ազգային անվտանգության մասնագետների պատրաստման բարձրագույն դպրոց, որտեղ կներգրավվեն նաև արտերկրի տարբեր ծառայություններում մեծ ներդրում ունեցած հայազգի մասնագետները: Կկարողանանք դաշնակից բարեկամ պետությունների հետ տեղեկատվական համատեղ փոխանակումների կայուն և հնարավորինս վստահելի համակարգ ստեղծել: ԱԱԾ-ն պետականության խորքային հիմքերից է, կադրային հաճախադեպ փոփոխությունները բարվոք վիճակից չեն»: