««Իմ քայլի» պատգամավորներն ինձ ասել են՝ դուք սկսեք գործընթացը, վերջին պահին կմիանանք ձեզ»․ Նաիրա Զոհրաբյան

ԲՀԿ պատգամավոր Նաիրա Զոհրաբյանը, մինչև խորհրդարանի շենք մտնելը, հանրահավաքի մասնակիցների ներկայությամբ ասաց․ «Դիմում եմ իմ գործընկեր Էդմոն Մարուքյանին։ Էդմո՛ն ջան, երեկ շատ ճիշտ էիր ասել, որ չի կարող պարտված ղեկավարը մնալ: Նիկո՛լ, քեզ շատ բաներում կարելի է մեղադրել, բայց մի բանում չեմ ուզում մեղադրել։ Դու գիտես պատմություն, դու հասկանում ես, որ հնարավոր չէ՝ թուրքի առաջ Արցախը ծնկի բերած հայը շարունակի մնալ ղեկավար: Դու հասկանում ես, որ դա հնարավոր չէ: Կա իրավական տարբերակ՝ դու տալիս ես հրաժարական»:
Նաիրա Զոհրաբյանը կոչով դիմեց «Լուսավոր Հայաստան» կուսակցությանը և նրա ղեկավար Էդմոն Մարուքյանին, որ գան ԱԺ և մասնակցեն արտահերթ նիստ գումարելու նախաձեռնությանը»։
«Դիմում եմ «Իմ քայլի» պատգամավորներին, ովքեր կապի տարբեր միջոցներով ինձ ասել են, որ զարհուրած են, որ ցավում են, ասել են՝ դուք սկսեք գործընթացը, վերջին պահին մենք կմիանանք ձեզ: Չկա վերջին պահ, սա միակ և ճակատագրական պահն է»,- նման հայտարարությամբ հանդես եկավ ԲՀԿ պատգամավորը։