«Դու իմ սրտին մի մեռի. տարել, երեխեքի գլուխը կերել եք». անհետ կորածի ծնողը՝ հրամանատարին

Էջմիածնի զորամասի տարածքում բողոքի ակցիա իրականացնող անհետ կորած զինծառայողներից մեկի ծնողը լրագրողների ներկայությամբ զանգահարեց տեղի հրամանատար Արսեն Աբգարյանին ու հայտնեց, որ ծնողներն իրեն են սպասում, ինչո՞ւ չի դիմավորում: Փոխարենը հրամանատարն ասաց, որ իրենք արդեն հայտարարություն են տարածել. ժամը հինգին ծնողներին կընդունեն, կզրուցեն նրանց հետ: «Ուրեմն ուշադիր լսիր, դու Հռոմի պապը չես, դու պարտավոր ես այս 34 ծնողին պատասխան տալ, թե որտեղ են իրենց երեխաները: Հիմա քեզ բոլորը լսում են, լրատվամիջոցներն էլ ձայնագրում են: Դո՛ւրս արի, Աբգարյան Արսե՛ն»,- ասաց ծնողը:

Արսեն Աբգարյանը պատասխանեց «շատ լավ» և անջատեց հեռախոսը:

Ծնողները, այլ ելք չգտնելով, տեղում որոշեցին մտնել զորամասի տարածք: Նրանց դիմավորեց հրամանատար Արսեն Աբգարյանը և փորձեց բանակցել: Ծնողները նրան մեղադրեցին, որ իրենց որդիները չունեին զրահաբաճկոն և այլ անհրաժեշտ իրեր, փոխարենը հրամանատարն կրկնում էր. «Մեռնեմ սրտիդ, ես կապ չունեմ, հրաման են տվել, կատարել եմ»: Ծնողներից մեկն ասաց. «Դու իմ սրտին մի մեռի. տարել, երեխեքի գլուխը կերել եք»:

Հավաքվածները հրամանատարին կոչ արեցին հանել համազգեստը և միանալ իրենց պայքարին՝ ՀՀ կառավարության դիմաց հացադուլ սկսելով, այնուհետև պահանջեցին, որ վերջինը զանգահարի իր վերադասին՝ պարզելու համար, թե իրենց որդիների որոնողական աշխատանքներն ի՞նչ փուլում են: Արսեն Աբգարյանը մտավ զորամաս: