Անհետ կորածների ծնողները կհանդիպեն Օնիկ Գասպարյանի և ՊՆ այլ ներկայացուցիչների հետ

Անհետ կորած զինծառայողների ծնողներն այս պահին Էջմիածնի զորամասից շարժվում են ՀՀ Պաշտպանության նախարարություն, որտեղ հանդիպելու են ՀՀ զինված ուժերի գլխավոր շտաբի պետ, գեներալ-գնդապետ Օնիկ Գասպարյանի, ՀՀ ԶՈՒ ՌՔԿՊ զորքերի պետ Նշանյան Վարդանի և ԶՈՒ պատրաստության գլխավոր վարչության պետ - զինված ուժերի գլխավոր շտաբի պետի տեղակալ, գեներալ-լեյտենանտ Անդրանիկ Մակարյանի հետ:

Ծնողներն իրենց որդիների անհայտ ճակատագրի հարցում մեղադրում են Անդրանիկ Մակարյանին՝ պնդելով, որ հենց նրա տված հրամանի հետևանքով է, որ իրենց որդիներն այժմ անհետ կորած են:

«Ես վստահում եմ ռազմականի տղերքին, քանի որ նրանցից մեկին ասացին, որ մեզ ուղեկցի ու ՊՆ-ում արդեն բոլորիս կդիմավորեն: Հիմա քանի որ մեզ հետ ռազմականն ա, մենք վստահելով գնում ենք, եթե՝ չէ, նորից հետ ենք գալու էստեղ՝ Էջմիածնի զորամաս»,- լրագրողների հետ զրույցում ասաց անհետ կորած զինծառայողի մայր տիկին Անահիտը: