«ՀՔԾ-ի հերքումը հանցագործության մասին հաղորդում է՝ ինքնախոստովանության որոշակի երանգով»․ Արթուր Ղազինյան

«Հայրենիքի փրկության շարժում» իրավական հանձնախմբի ղեկավար Արթուր Ղազինյանն անդրադարձել է ՀՔԾ-ի՝ այսօրվա հաղորդագրությանը, թե Նիկոլ Փաշինյանի նկատմամբ քրգործ հարուցելու մասին իր գրառումն ապատեղեկատվություն է:

Ըստ Ղազինյանի՝ Նիկոլ Փաշինյանը չի հանդիսացել ՀՀ Զինված ուժերի գլխավոր հրամանատար, սակայն իրեն կարգելով այդ պաշտոնում, ԶՈՒ-երին հրահանգներ է տվել։

«Մենք այստեղ գործ ունենք լիազորությունների չարաշահման, իշխանության յուրացման և ապօրինի տրված հրամանների հետ»,- ասել է Ղազինյանը՝ հավելելով, որ Մովսես Հակոբյանի հայտարարությունների հիման վրա ՀՔԾ-ում քրեական գործ է հարուցել։ Ըստ նրա՝ ՀՔԾ-ն անհապաղ պետք է Փաշինյանին ներգրավվեր որպես մեղադրյալ, ապա նրան առաջադրեր մեղադրանք, ու կասեցներ նրա լիազորությունները և կիրառեր կալանքը՝ որպես խափանման միջոց։

«ՀՔԾ-ի այսօրվա հերքումը ոչ այլ ինչ է, քան հանցագործության մասին հաղորդում՝ ինքնախոստովանության որոշակի երանգով։ Նրանք պարտավոր էին հարուցել քրեական գործ, դա չեն արել, դա առանձին քրեաիրավական գնահատականի առարկա է հանդիսանում»,- նշել է նա:

Ղազինյանը հայտնել է նաև, որ հանցագործության մասին նոր հաղորդում են ներկայացնելու, բայց այս անգամ արդեն ԱԱԾ-ում, «որովհետև ՀՔԾ-ն հանցավոր անգործություն է դրսևորում»:

Մանրամասները՝ տեսանյութում: