«Մենք տեղյակ ենք, որ Մովսես Հակոբյանի ներկայացրած փաստերի հիման վրա քրեական գործ է հարուցվել». Ռուբեն Մելիքյան

«Սա ինքնաբուխ ակցիա է՝ բացառապես իրավաբանների մասնակցությաբ»,- լրագրողների հետ զրույցում հայտարարեց իրավապաշտպան Ռուբեն Մելիքյանը՝ նշելով, որ պատրաստվում են շուտով զինվորական դատախազից խնդրել հրատապ ընդունելություն:
«Մենք բազմաթիվ հարցեր ունենք՝ կապված պատերազմի հետ: Մենք ունեցանք մեր պատմության ամենախայտառակ կորուստները, բայց որևէ իրավական հետևանք կարծես թե չի առաջանում»,- նշեց նա:
«Մենք տեղյակ ենք, որ գեներալ Մովսես Հակոբյանի ներկայացրած փաստերի հիման վրա քրեական գործ է հարուցվել՝ պաշտոնական դիրքի չարաշահման հոդվածով, որը հանգեցրել է ծանր հետևանքների, և մենք սպասում ենք տեսնելու, թե ով է այդ գործը քննում: Արդյո՞ք զինդատախազությունն է հսկողություն իրականացնում: Ցանկանում ենք իմանալ՝ այլ փաստերի առթիվ քրեական գործ հարուցվում է, թե ոչ»,- հավելեց իրավապաշտպանը:
Հիշեցնենք, որ մի խումբ իրավաբաններ հավաքվել են Զինվորական դատախազության շենքի մոտ: Նրանք հավաքվել են պարզելու, թե պատերազմից մեկուկես ամիս անց ինչ քայլեր են ձեռնարկվել, և մի շարք ի հայտ եկած հանգամանքների հիման վրա արդյոք հարո՞ւցվել են քրեական գործեր և, եթե հարուցվել են, ապա ինչ փուլում են և ինչու հանրությունը տեղյակ չէ դրա մասին: