«Ես չեմ հասկանում, թե ինչու է այն վազելով իրականացվում». Մարուքյանը՝ սահմանագծման աշխատանքների մասին

ԼՀԿ ղեկավար Էդմոն Մարուքյանն այսօրվա ասուլիսում, ի պատասխան հարցին, թե սահմանագծման ու սահմանազատման գործընթացում, ըստ իրեն, որպես հիմք խորհրդային քարտեզի սահմա՞նը պիտի ընդունվի, թե՞ նոր սահմաններ գծվեն, ասաց. «Ես չեմ տեսել այն քարտեզը, որով իրականացվում է այս գործընթացը: Չեմ հասկանում, թե ինչու է վազելով իրականացվում. կարելի էր հանգիստ հանձնաժողով կազմել, ընդդիմութան ներկայացուցիչներին էլ ներգրավել այդ հանձնաժողովում, որ մենք էլ տեղյակ լինեինք»,- նկատեց նա: «Ակնհայտ է, որ Ադրբեջանի պահվածքը Սյունիքում, սահմանազատման հետ կապված, պատերազմի հետևանք է: Չլիներ մեր պարտությունը պատերազմում, այս հարցին երբեք չէինք հանգելու, բայց նաև մյուս կողմից, հասկացանք, որ պարտվել ենք և դրա վերաբերյալ փաստաթուղթ է ստորագրվել, բայց հարցեր կան, որ կարելի է հանգիստ բանակցել և հայանպաստ լուծումներ գտնել»,- հավելեց նա: