Ավագանու «Իմ քայլը» խմբակցության անդամն առաջարկում է քաղաքապետի, նրա տեղակալների, վարչական շրջանների ղեկավարների աշխատավարձերը բարձրացնել 100%-ով

Երևանի ավագանու նիստի ժամանակ քաղաքապետի տեղակալ Սերգեյ Ներսեսյանը զեկուցեց Երևանի 2021 թվականի բյուջեի, հողամասերի նպատակային նշանակությունը փոխելու նախագծերի մասին:

«Իմ քայլը» խմբակցության անդամ Տիգրան Գալստյանի հարցին, թե 2021 թվականին պարգևավճարներն ինչքա՞ն են նախատեսվել, փոխքաղաքապետը պատասխանեց՝ 1 մլրդ 23 մլն դրամ, որը նախորդ տարվանից շուրջ 49%-ով պակաս է: Տիգրան Գալստյանը նշեց, որ «պարգևավճարների ձևաչափին կտրականապես դեմ է, քանի որ շարունակաբար մամուլով քննադատում են, բայց դա իրականում աշխատավարձ է»: Տիգրան Գալստյանի կարծիքով պետք է դրսևորվի քաղաքական կամք և աշխատավարձերը բարձրացվեն՝ 30, 50, 100%-ի չափով՝ ըստ պատասխանատվության չափի. «Առաջարկում եմ քաղաքապետի, նրա տեղակալների, վարչական շրջանների ղեկավարների, նրանց տեղակալների, վարչության պետերի, նրանց տեղակալների աշխատավարձը բարձրացնել 100 տոկոսով, բաժնի պետերինը՝ տեղակալներով՝ 50 տոկոսի չափով, քաղաքապետարանի մնացած աշխատակիցներինը՝ 30 տոկոսի չափով»:

Ի պատասխան՝ Երևանի քաղաքապետի տեղակալն ասաց, որ այս պահի դրությամբ չեն կարող դա որպես աշխատավարձ դիտարկել, դրա համար հարկավոր է աշխատավարձերի հետ կապված նախագիծ մշակել, որը պետք է համատեղ մշակվի ավագանիների հետ:

Նրանք համաձայնության եկան, որ դա հրատապ հարցերից է և պետք է մինչև փետրվար՝ բյուջեի լրամշակումը, պարևավճարների ձևաչափը հանվի և աշխատավարձերը բարձրացվեն: