«Ես եղել եմ այնտեղ, գիտեմ՝ ինչ է կատարվել». Վլադիմիր Գասպարյանը՝ Շուշիում ոստիկանների մահվան դեպքի մասին

Սուրբ Գայանե եկեղեցու բակում լրագրողների հետ զրույցում ՀՀ նախկին ոստիկանապետ Վլադիմիր Գասպարյանն, անդրադառնալով Շուշիի մշակույթի տան հրթիռակոծման հետևանքով ոստիկանների զոհվելու դեպքին, ասաց. «Ես եղել եմ այնտեղ, ես գիտեմ՝ ինչ է այնտեղ կատարվել։ Դրա պատասխանները պահանջելու եմ՝ ուշ, թե շուտ. կարծում եմ՝ շուտ։ Չէի ասի՝ խաբեությամբ տարել են։ Բանակը կորցրել էր իր կառավարումը, չէր կառավարվում, որովհետև, երբ սպաների, գեներալների գործունեության մեջ քաղաքացիներ են մտնում և քմահաճույքներ են իրականացնում, մարդկանց հոգին փառավորվում է, երբ ոստիկաններ են ծեծում, դա այդ հոգուն փառավորվելու շարունակությունն է։ Ինձ պետք է պատասխան տան, որովհետև իմ տղաներն են, երկար տարիներ նրանց հետ եմ եղել»: Գասպարյանը նաև ընդգծեց, որ զոհված ոստիկաններին գաղտագողի են հուղարկավորել։