««Աղբ»-ը գտնում եմ, «մարդու կղանք»-ը գտնում եմ, «անմաքուր»-ը չկա ու չկա». Արտակ Հարությունյան

Ակտիվիստ Արտակ Հարությունյանը ֆեյսբուքյան իր էջում գրել է. «Էսօր Նաիրա Զոհրաբյանը բացատրել ա իր ասածը, մեջբերում եմ. «Բացեք Սուքիասյանի բառարանը, ժեխի հոմանիշն անմաքուրն է, ժեխի հոմանիշը, դուք գիտեք, ինչն է ժեխի հոմանիշը, նշանակում է, որ անմաքուր մարդիկ, այո, փորձում են սատարել մի մարդու և սատարում են, ով հանձնել է Արցախը»։
Բացեցի Սուքիասյանի բառարանը, 1967 թ.-ի, նայեցի ժեխն ու ժախը, հետո բացեցի Սուքիասյանի 2009 թ.-ի բառարանը, հետո բացեցի Աղայանի բացատրական բառարանը, ԺՀԼԲ-ն բացեցի, ուրիշ բառարաններ նայեցի։ Չեմ գտնում էդ անմաքուրը։ «Աղբ»-ը գտնում եմ, «մարդու կղանք»-ը գտնում եմ, ուրիշ բառեր էլ եմ գտնում։ «Անմաքուր»ը չկա ու չկա։
Ու քանի որ ԱԺ պատգամավորը, մարդու իրավունքների պաշտպանության հանձնաժողովի նախագահը, սկզբունքային ընդդիմադիրը չի կարող ստախոս լինել, ապա ես հուզվել եմ ու ուզում եմ գտնել Սուքիասյանի էն բառարանը, որտեղ ժեխը «քաքի» ու «զիբիլի» փոխարեն «անմաքուր» ա գրված։ Ախր ես բառարաններ շատ եմ սիրում, օգնեք ինձ գտնել այդ անհայտ բառարանը։