«Կափսոսեմ, եթե ստվերային տասը միլիոն դոլարի համար կողմ քվեարկեք այդ որոշմանը»․ Լենա Նանուշյան

Այսօր՝ ԱԺ արտահերթ նիստում երկրորդ ընթերցմամբ «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքում փոփոխություններ կատարելու հարցը քննարկելիս Առողջապահության փոխնախարար Լենա Նանուշյանն ասաց․ «Մենք ձեզ հետ քննարկումներում կիրառեցինք ապացուցողական, գիտական հիմք ունեցող փաստեր և միջազգային հեղինակավոր կազմակերպությունների կողմից սահմանված մարդակենտրոն մոտեցումներ։ Ասում եք՝ ԵԱՏՄ-ի հետ խնդիր կա, ասում ենք՝ պատրաստ ենք ապացուցել, որ ոչ մի խնդիր չկա, ասում եք՝ արտահանումը կդժվարանա, ասում ենք՝ մի՛ մտածեք, չի դժվարանա, տնտեսական վնասից եք խոսում, որևէ թիվ չեք բերում՝ որպես հիմնավորում․․․»։
«Պատգամավորների ներկայացրած նախագիծը հանգեցնելու է ծխողների թվի ավելացման՝ ի հաշիվ մեր երեխաների, որովհետև մեկ տարով ծխախոտի գովազդն եք երկարաձգելու»,- հավելեց Նանուշյանը։
«Ես շատ կափսոսեմ, եթե ստվերային ընդամենը տասը միլիոն դոլարի համար դուք կողմ քվեարկեք այդ նախագծին»,- եզրափակեց նա։