«Ո՛չ շուռնուխցին, ո՛չ էլ որոտանցին հանձնվող չեն». Սոֆյա Հովսեփյան
230
Ուրբաթ, 01 հունվարի, 2021 թ., 03:10
ԱԺ պատգամավոր Սոֆյա Հովսեփյանը ֆեյսբուքյան իր էջում գրել է. «Իմ շատ սիրելի հայ ազգ, 2020-ի ամփոփումը բարդ է: Անհամբեր սպասել եմ այս օրվան՝ մի ներքին համոզմամբ, որ 2020 թվականի հեռացումը վերջ կդնի հայ ազգի ծանր ու անդառնալի կորուստներին ու կդառնա պատմություն, որը կստիպի վերաարժևորման կարևոր ճանապարհ անցնենք: Ավանդույթի համաձայն, ամանորի նախաշեմին, վերջին տարիներին լինում եմ սահմանամերձ գյուղերում, բայց ամեն անգամ ոգևորություն էի ապրում, քանի որ մեր սահմանաբնակներն այնքան էին ամրացել այս տարիների ընթացքում, որ մեզ էին ոգևորում և իրենց ուժով ապրեցնում: Այսօր Սյունիքում էի՝ Շուռնուխ, Որոտան ... Չէ, չմտածե՛ք, մարդիկ մարտական էին, մարդիկ վճռական էին, իրենք իրենց հողի տերն են, բայց... Մի քանիսը արդեն ապահովության համար իրենց տանից դուրս են գալիս և ամանորի շեմին տարիներով ստեղծածը ստիպված են թողնել... Նյութական առումով կարող ենք ասել, որ հին տուն էր, ավելի լավը կունենան, ավելի նոր տան մեջ գալիք տարին կնշեն, բայց ինչպես ասվում է Ա . Իսահակյանի «Համբերանքի չիբուխ»-ում Կանաչ դաշտի պարզ հոլիկը Շահի ոսկե քյոշքից լավ է, Քրտինքովդ կերած հացը Սուլթանների ճաշից լավ է։ Մի բան էր կարևոր, որ ո՛չ շուռնուխցին, ո՛չ էլ որոտանցին հանձնվող չեն: Վաղը կգնամ Քարահունջ, հետո էլ Արցախ: Խնդրում եմ մեկնաբանություններ չգրեք գրառմանս տակ և հնարավորություն տանք բոլորիս, տարեմուտի այս վերջին րոպեներին խորհենք անցածի մասին և աղոթենք թե՛ զոհված զինվորների հոգու հանգստության համար, թե՛ գերեվարված ու անհետ կորածների շուտ վերադարձի համար, թե՛ վիրավոր զինվորների արագ ապաքինման համար: Հանուն հայ զինվորի, հանուն հայ սահմանապահի, հանուն հայ ազգի մեզ մաղթում եմ միասնականություն և ազգային ու հոգևոր առողջություն»:
