«Մինչև յուրաքանչյուր տարվա մարտի 31-ը պետք է հրապարակեն ֆինանսական հաշվետվություններ». Արթուր Հովհաննիսյան

ԱԺ «Իմ քայլը» խմբակցության պատգամավոր Արթուր Հովհաննիսյանը ֆեյսբուքյան իր էջում գրել է․ «Եթե «Զանգվածային լրատվության» մասին օրենքում մեր առաջարկած փոփոխություններն օրենքի ուժ ստանան, ապա լրատվամիջոցները մինչև յուրաքանչյուր տարվա մարտի 31-ը պետք է հրապարակեն ֆինանսական հաշվետվություններ, որոնք պարտադիր պետք է ներառեն տեղեկություններ՝

. գովազդից և այլ վճարովի եթերաժամից,

. սեփական արտադրության տպագիր պարբերականի, տեսաշարային, ձայնաշարային և տեսաձայնաշարային նյութերի վաճառքից, ծ

. բաժանորդային վճարումներից,

. հովանավորությունից,

. կառավարման վրա ազդեցություն ունեցող անձի կամ անձանց ներդրումներից և օրենքով չարգելված այլ աղբյուրներից ստացված եկամուտների մասին:

Կարծում եմ՝ հենց այս կարգավորման փաստով է պայմանավորված որոշ քաղաքական գործիչների, խորհրդարանական ընդդիմության որոշ ներկայացուցիչների վախերը, որոնք իրենց այդ վախերն ու դժգոհությունները կամ որոշ լրատվականների հետ անմիջական կապը փորձում են քողարկել անհայտ ծագում ունեցող աղբյուրներին հղում անելու արգելքի դրույթն առանց որևէ հիմնավորման քննադատելու միջոցով։

Հ․ Գ․ Իհարկե, խոսքս որևէ կերպ չի կարող վերաբերել այն մասնագետներին, որոնց հետ արդեն երրորդ օրն է հանրային քննարկումներ ենք ունենում»։